Si Hesus Ang Tanging Daan

Ang Mga Gawa 13:26-33
Salmo 2:6-7, 8-9,10-11
Juan 14:1-6

Nung bago pa lang ako nangangaral, inimbitahan ako na magsalita sa isang lugar halos labas na ng Maynila. Mag-isa lang akong nagmamaneho at maulan ng gabing iyon. Noong una sinikap kong hanapin ang lugar, pero nang magkamali ako ng liko nakaramdam ako ng takot. Halos dalawang oras akong paikot-ikot. Nagtanung-tanong ako sa mga tao ngunit tila lalo akong napapalayo. Uuwi na lang sana ako pero naliligaw ako.
Nagbilang ako't umawit ng lahat ng naisip kong awitin ng gabing iyon. Kahit hindi ko alam ang awit, tuloy lang ako sa pagkanta.
Biglang may puting sasakyan na humarang sa akin. Magagalit sana ako hanggang nakita ko sa likod ng sasakyan ang mga salitang, "Ako ang Daan." Alam kong padala ng Diyos 'yon kaya sinundan ko ito. At tama nga! Nakarating ako sa aking pupuntahan.
Nakapagbigay pa rin ako ng maiksi ngunit makapangyarihang salita sa unang pagkakataon noong gabing iyon. Arun G.

Pagninilay: Salamat sa mga pagsubok na nararanasan ko. Dahil dito nakikita ang Iyong mga ginagawa.

Panginoon, ikaw ang daan, katotohanan at ang buhay.

Hilaga Ng Banal Na Kompas

1 Corinto 15:1-8
Salmo 19:2-3, 4-5
Juan 14:6-14

Sinubukan kong gamitin ang T9 dictionary ng kauna-unahang cell phone ko at naisip ko na wala itong kwenta at nakakairita lang. Isinulat ko ang "W-H-E-N" at ang lumalabas ay iba. Kaya tinigil ko ang paggamit nito at bumalik sa dating paraan ng pag text. Isang pindot sa W, dalawang pindot sa H, dalawang pindot sa E, at dalawang pindot sa N. Minsan isinusulat ko ng W-E-N para madali. Iyon ang paraan ng pagtetext.

Isang araw, sinabi ng aking kaibigan na napakadaling gamitin sa pagtetext ang T9 dictionary. Dinala niya sa ko sa isang tabi at tinuruan kung paano ito gamitin.

Madalas ganun din ang ating ugali. Hindi natin alam ang lahat tungkol sa isang bagay kaya madalas tayong biktima ng maling akala.

Iyon ang dahilan kung bakit sinabi ni Hesus sa Siya ang katotohanan. Kung wala Siya bilang ating True North - o hilaga ng ating banal na kompas - baka kahit ano na lang ang maaring maging tama o mali para sa atin. Sa ating mund na puno ng kumpromiso. Siya ang boses ng nagsasabi, "Ito ang daan, daanan ninyo ito" (Isaias 30:21). Rissa S.

Pagninilay: Para sa iyo, sino ang autoridad ng katotohanan?

Panginoon, Ikaw ang aking katotohanan. Nawa'y mamuhay ako sa katotohanan.

Pakaw

Ang Mga Gawa 12:24 - 13:5
Salmo 67:2-3, 5, 6, 8
Juan 12:44-50

Alam niyo ba kung ano ang pakaw? Ito ay maliit na parte ng hikaw na nakakabit sa likod ng tenga. Isang gabi, nahulog ko ang aking pakaw sa ilalim ng kama. Kinabukasan, hinanap ko ito ngunit hindi ko maurong ang higaan. Gumamit ako ng flashlight para makita ang ilalim. Mga ilang sandali ay nakita ko ang aking pakaw. Nakita ko din ang aking sapatos na akala'y nawala, at pati na rin isang damit na napuno ng alikabok.

Si Hesus bilang Liwanag ng Sanlibutan ay tinutulungan tayo na makita ang ating "pakaw." Gusto kong isipin na ang nawawalang bagay na ito ay ang imahen ng Diyos sa ating katauhan. Hindi ito makita dahil natatabunan tayo ng maraming bagay. May mga nag-iisip na upang makita ang pakaw ay dapat wala tayong bagahe. Siguro hindi yon ang iniisip ni Hesus. Alam Niya na ang tanging paraan ay tumingin sa pamamagitan ng Kanyang mga mata sa kadiliman na bumabalot sa atin at hanapin ang ating mga sarili. Kapag ginawa natin iyon, handa na tayong mag-umpisang linisin ang ating mga sarili. At baka sakali ang totoo nating sarili na nilikha ng Diyos ay umpisa nang lumago. Victoria L.

Pagninilay: Kung hindi mo alam ang sagot, tumingin ka sa Liwanag.

Buksan Mo ang mata ng aking puso, Panginoon, upang makita ko sa aking sarili kung ano ang nais Mo sa akin.

Siya Na Ba?

Genesis 1:26 - 2:3
o Colosas 3:14-15, 17, 23-24
Salmo 90:2, 3-4, 12-13, 14, 16
Mateo 13:54-58

Nais malaman ni Marie kung ang manliligaw niyang si Clem ay talagang para sa kanya. Siya ay mestizo, malambing at magaling magsalita. Laging kinikilig si Marie kapag nagsalita na si Clem. (Halimbawa: "Kung ang mga bituin sa langit ay babagsak sa tuwing iniisip kita, ang langit ay mawawalan na ng bituin.")

Ngunit binabalaan siya ng kanyang magulang, "Marie, wala siyang trabaho!" Ang sagot naman niya, "Gusto lang niya ang kalayaan niya; hindi siya pwedeng ikahon." Sinabihan din siya ng kanyang pinsan, "Marie, playboy siya, eto ang listahan ng mga babaeng niloko niya," at inabutan siya ng directory. Sinabi ni Marie, "Palakaibigan lang talaga siya." Ganun din, sinabi ng kanyang mga kaibigan, "Napapansin mo ba ang marka ng karayum sa kanyang braso? Adik yan." Sagot ni Marie, "Hindi, mahilig lang siya mag cross-stitch."

Malimit, nangungusap ang Diyos sa pamamagitan ng ordinaryong tao. Pero hindi natin kinikilala ang ating mga propeta kung wala sila sa mataas na bundok, at nakasuot ng makintab na balabal at may mahabang balbas. Ayaw natin ang mga naka-jeans at t-shirt. Sayang. Naiwasan sana ni Marie ang paghihirap. Bo S.

Pagninilay: Makinig sa mga taong may sentido kumon.

Panginoon, ipakita Mo ang propeta na pinadala Mo para sa akin, hayaan Mo na malaman ko ang iyong sinasabi sa pamamagitan nila.

Paghahanap Ng Kalooban Ng Diyos

Ang Mga Gawa 11:1-18
Salmo 42:2-3, 43:3, 4
Juan 10:1-10

Dahan-dahang sumisikat ang araw sa silid kung saan kami nagdadasal. Ang malamig ng hangin mula sa Dagat ng Galilea sa harap namin ay dumampi sa aming mga pisngi. "Hinga papasok, bumuga palabas," nilalagyan ng tono ng aming lider.

Habang sumusunod ako, nagkaroon ako ng pangitain. Nakita ko ang aking sarili sa dulo ng mahabang tulay. Sa kabilang dulo ay si Hesus, inabot ang Kanyang kamay sa akin at sinabi, "Lumapit ka."

Binuksan ko ang aking mga mata. Imahinasyon ko lang ba iyon? Ang aking mga kasamahan ay nakapikit pa rin ang mga mata. Kaya pumikit ako muli, at pinagpatuloy ang paghinga papasok, buga palabas, "Panginoon, tinatawag mo ba akong maging madre?"

Nangyari ito noong Mayo 1997. Ang paghahanap ko sa kalooban ng Diyos ay nagkaroon ng kasagutan. Minsan hindi tiyak na oo o hindi, ngunit nakikinig ako ng husto para matugon ang Kanyang tawag. Tess VA.

Pagninilay: Alalahanin mo ang mga panahon na tinatawag ka ng Diyos. Paano ka tumugon?

Panginoon, buksan Mo ang aking puso upang marinig ko ang tawag Mo.

Ang Bulag Na Umakay Sa Bulag

Ang Mga Gawa 13:14, 43-52
Salmo 100:1-2, 3, 5
Pahayag 7:9, 14-17
Juan 10:27-30

May isang batang Pranses na ang pangalan ay Louis. Natusok niya ang kanyang mata noong tatlong taon pa lamang siya. Naimpeksyon ito at kumalat sa kabilang mata. Makalipas ang ilang araw siya ay tuluyang nabulag.

Sa kabila ng kanyang kapansanan, nabuhay siya ng normal. Tumutulong siya sa gawaing bahay at pumapasok sa eskwela. Pinadala siya sa Special School for the Blind sa Paris sa edad na 10 taong gulang.

Mahilig si Louis magbasa. Ang mga aklat sa silid-aklatan ay may malalaking letra na naka-angat sa pahina. Nararamdaman niya sa kaniyang mga kamay ang bawat letra ngunit matagal niyang mabasa ang isang pangungusap. "May mas magandang paraan," naisip niya.

Pinag-aralan ni Louis ang "nightwriting" ng ginagamit ng militar ng Pranses. Dito, ang mga tuldok ay nakaumbok sa matigas na papel at masasalat mo. Nagustuhan ni Louis ang pamamraang iyon at nagsimulang gumawa ng sarili niyang alpabeto. Kaya nagkaroon ng Braille Alphabet. Salamat sa kanya, ngayon mabilis at madaling nakakabasa ang mga bulag. Judith C.

Pagninilay: Paano mo mapapagaan ang gawain ng iyong mga kasamahan?

Nawa ang aking mga kahinaan ay gamitin Ninyo upang tulungan ang mga nanghihina.

Pagtulog Sa Tag-init

Ang Mga Gawa 9:31-42
Salmo 116:12-13, 14-15, 16-17
Juan 6:60-69

Madalas nasisira ang pagtulog ko tuwing bakasyon. Pag summer lampas hatinggabi na ako kung makatulog. Kaya nagigising ako ng mga alas 10 ng umaga o lampas pa. Dahil dito, halos tanghalian na ako nakakapagdasal.

Kaya nagdesisyon ako ng baguhin ang oras ng aking pananalangin sa alas siete ng umaga.

Kahit alam ko na mahirap gawin, nangako akong tutuparin ko iyon. Maraming beses na nakakatulog ako habang nagdadasal. Nabibilang ko kung ilang beses ako nakakapagdasal na gising sa itinakda kong oras.

Pero dahil sa pinahahalagahan ko ang oras ko sa Panginoon, sinisikap ko pa rin na gumising ng alas-siete. Alam ko pinahahalagahan ng Diyos ang aking pagsusumikap dahil gusto ko Siyang pinakauna kong kakausapin sa umaga. Tina M.

Pagninilay: Ano ang kailangan mo upang ikaw ay gumaling?

Hilumin Mo ako, Panginoon, upang magawa ko ang Iyong kalooban.

Panliligaw Ni Hesus

Ang Mga Gawa 9:1-20
Salmo 117:1-2
Juan 6:52-59

Ang ating relasyon kay Hesus ay tulad ng ligawan ng isang lalaki at babae. Sa una ay sinisikap ng lalaki na makuha ang atensyon ng babae. Ngunit kapag nabigo siya sa kanyang ginagawa, naghahanap siya ng magiging tulay.

Nakuha ni Hesus ang aking atensyon nang ako ay naglakbay minsan sa Holy Land. Binihag Niya ako ng Kanyang nakamamanghang pag-ibig sa bawat lugar na aming pinupuntahan lalo na sa Bethlehem kung saan Siya ipinanganak. Dahil sa tindi ng Kanyang pag-ibig, ninanais ko na maging kabiyak Niya bilang madre. Kaya lang, hindi iyon ang plano Niya para sa akin.

Si Sr. Mary James Wilson, RGS, ang naging Ananias ko at hanggang ngayon ginagabayan pa niya ako. Iminulat niya ang aking mata sa pananampalataya at tinanggap niya ako ng lubusan.

Sa bawat pagkakataon, ipinapadama ni Hesus ang Kanyang pag-ibig sa iba-t-ibang paraan. At di Siya nagkulang na ipadala ang mga Ananias sa buhay ko! Tess VA.

Pagninilay: Sino ang pinadala ng Diyos sa buhay mo bilang iyong Ananias?

Panginoon, sa panahon na hindi Kita binibigyan ng pansin, bigyan Mo ako ng grasya upang makita Kita.

Hindi Ka Nag-iisa

Ang Mga Gawa 8:26-40
Salmo 66:8-9, 16-17, 20
Juan 6:44-51

Hindi madali ang magtayo ng bagong kumpanya. Alam ko dahil ginagawa ko ito ngayon. Mga permits at SEC papers ang unang bahagi ng trabaho. Pati paghahanap ng mga investors. At syempre kailangan din na gumawa ng business plan, feasibility study at marketing strategy, pati ang mga konstruksyon at mga kontrata. At ang huli ay kung paano paiikutin ang pera.

Hay! Sinusulat ko pa lang nakakapagod na!

Ngunit iyon ang dahilan kung bakit kami may consultants. Mas may kaalaman sila kaysa sa aming mga partners. Binigyan nila kami ng sapat na impormasyon para makagawa ng desisyon.

Hindi nilikha ng Diyos ang tao para mabuhay mag-isa at hiwalay sa iba. Kung iyon ang nais Niya, hindi magkakaroon si Adan ng Eba. O kaya'y hindi niya inutusan si Felipe na habulin ang pinunong taga-Etiopia.

Meron ka bang malaking problema? Maaaring hindi mo pinapansin ang kamay na inaabot sa iyo ng isang kaibigan. Payo ko sa iyo: Tumingin ka sa iyong paligid at mapapansin mo ang mga biyaya ng Diyos sa iyo. Victoria L.

Pagninilay: Ikaw ba ay umaasa lamang sa sarili?

Salamat sa mga taong pinapadala Mo para tuloy pa rin ang aking paglalakbay patungo sa Iyo.

Pagbabalik Sa Eskwela

1 Pedro 5:5-14
Salmo 89:2-3, 6-7, 16-17
Marcos 16:15-20

Dati ko pang gustong mag-aral ng Masters. Isa iyon sa ninanais ng puso ko, ngunit inaalala ko ang oras, panahon at pinansyal na pangangailangan. Hindi ko rin alam kung mababalanse ko ang aking pagtatrabaho at pag-aaral.

Sa wakas, matapos ang limang taon na pagtatrabaho (pagkatapos na sabihin sa akin ng Diyos na kalimutan ang mga alalahanin), nag-enrol ako. Sa loob ng unang dalawang linggo sa MA Program, hindi na ako nakakatulog ng sapat.

"Kaya ko bang tapusin ito?" Gusto ko nang huminto na lang sa pag-aaral. Ngunit naramdaman ko na nangusap ang Diyos, "Magtiwala ka sa Akin, Ako ang nagdala sa iyo dito. Ako ang magsusuporta sa iyo. Ibibigay ko ang lahat ng pangangailangan mo para malaman mo na ito ay totoo."

Sa puntong iyon isinuko ko lahat ng aking alalahanin sa Diyos. At naging mabunga at masagana ang aking karanasan. Higit pa dito, nakapasa ako sa unang semestre na may matataas na grado, at ngayon ay nasa ikalawang semestre na ako! Coltics C.

Pagninilay: Pagod? Lapit ka lang sa Kanya.

Panginoon, ibinibigay ko ang lahat sa Iyong harapan. Turuan Mo ako na magtiwala na hindi Mo ako bibigyan ng pagsubok na hindi ko kakayanin, at ang Iyong pagmamahal ay laging nasa akin.

Basahin Ang Mga Tanda

Ang Mga Gawa 7:51 - 8:1
Salmo 31:3-4, 6, 7, 8, 17, 21
Juan 6:30-35

Fourth year college ako nang bumisita kami ng aking kaibigan sa isang kilalang auditing firm. Nasabi ko sa aking sarili, "Magiging auditor ako sa kompanyang ito."

Nakatapos ako ng kolehiyo at nanalo sa National Accounting Quiz na suportado ng kompanyang ito. Akala ko ay madali akong makakapasok sa trabaho dito. Gayunpaman, nang mabasa ng audit partner na ang aking kahinaan ay ang pagiging masumpungin (isinulat ko iyon dahil wala akong maisip na sagot), sinabi niya sa akin, "Hindi ka karapat-dapat na maging auditor." Nanlumo ako nang husto dahil di natupad ang aking pangarap.

Pagkalipas ng ilang linggo, nakatanggap ako ng telegrama mula sa kumpanya. Inalok ako ng kontraktwal na trabaho. Nung una, walang kinalaman ang aking trabaho sa auditing, pero lumipas ang isang buwan, nalipat ako sa Audit Division. Sa ika-anim na buwan naging regular na empleyado ako, na-promote ako pagkalipas ng dalawang taon at ipinadala sa U.S. upang mag-training.

Alam ng Diyos na ako ay karapat-dapat na maging auditor doon. Hindi na Niya kinakailangang magpakita pa ng tanda. Judith C.

Pagninilay: Paano mo hinuhusgahan ang mga tao?

Salamat po, Panginoon, dahil minahal Mo ako maging sinuman ako.

Hindi Ito Tungkol Sa Akin

Ang Mga Gawa 6:8-15
Salmo 119:23-24, 26-27, 29-30
Juan 6:22-29

Sa tuwing ako ay nananalangin, humihingi ako ng aking pangangailangan. Minsan, ang hinihingi ko ay kung ano ang gusto ko. At ipinagkakaloob naman ng Diyos.

Kapag hindi Niya tinugon ang aking dasal sa paraan na aking inaasahan, nagpapatuloy ako sa pagdarasal hanggang sa manghina ang aking pananampalataya. Sinisisi ko Siya sa lahat, pati sa hindi magandang pangyayari.

Pero pagkatapos ng mga matinding pagsubok, dumarating ang karunungan ng Diyos.

Nauunawaan ko na hindi ko dapat pilitin ang Diyos na ibigay ang mga inaasahan ko. Alam niya ang makabubuti sa akin. Ang kailangan kong gawin ay manalig upang maunawaan at malaman ang Kanyang nais.

Sa ganitong paraan ko matatanggap ang anumang ipagkaloob Niya sa akin.

Ang mahalaga ay ang nais Niya at hindi ang gusto ko. RosAnn J.

Pagninilay: Kanino umiikot ang mundo mo? Sa iyo o sa Diyos?

Ikaw ang nagpapaikot ng mundo, ang napapasikat ng araw at ang gumawa ng ulan. Ako ng nagpapakumbaba.

Hanggang Sa Katapusan

Ang Mga Gawa 5:27-32, 40-42
Salmo 30:2, 4, 5-6, 11-12, 13
Pahayag 5:11-14
Juan 21:1-19

Naaalala pa ba ninyo ang pelikulang The Matrix? Yung eksena pagkatapos malaman nila ang katotohanan na ang kanilang mundo ay peke (nabubuhay sila dahil sa simulasyon ng programa ng kompyuter)? Si Neo (Keanu Reeves) ay bumalik sa Matrix at pinagmasdan ang mga tao sa paligid. Alam na niya na ang katotohanan ay may wire na nakatali sa kanila papunta sa kompyuter na naghahari sa mundo. Nalaman niya na kung ano ang sinabi ng kompyuter, hindi siya susunod. Siya ay may mas mataas na tawag.

Alam natin na si Neo ay hindi aabot para makita ang "katapusan". Pero iniisip niya ay ang kalayaan ng lahat ng tao. Kaya patuloy pa rin siya - sa tatlong pelikula!

Oops. Okay lang na malaman ninyo ang katapusan kahit hindi niyo pa napapanood. Bakit? Dahil tulad iyon ng ating katapusan. Marami sa atin ay hindi aabot para makita ang "katapusan" - ang muling pagbalik ni Hesus sa lupa. Ang mahalaga ay maging tulad tayo ng mga alagad sa Gawa 5. Masigasig at tapat hanggang sa katapusan. Jomar H.

Pagninilay: Ikaw ba ay tapat?

Bigyan Mo ako ng lakas upang maging tapat sa Iyo hanggang wakas.

Maging Tulay

Ang Mga Gawa 6:1-7
Salmo 33:1-2, 4-5, 18-19
Juan 6:16-21

Alam mo ba kung bakit ganun na lamang ang hidwaan sa pagitan ng Tutsis at Hutu sa Rwanda? Nagsimula ito nang ang mga Belga ay dumating sa Rwanda. Pinili nila ang Tutsis upang maging pangalawa sa kanila. Ang dahilam: Ang Tutsis ay magaganda ang kutis at itsura, matatangos ang ilong at mas magandang tingnan kaysa sa mga Hutu. Kasama ng mga Belga, ang Tutsis ay namuno sa mga Hutu. Nang umalis ang mga Belga at naiwanan namuno ang Hutu ay sinimulan magpatayan ng dalawang tribo. Naganap ang masaker ng mga Tutsi.

Selos. Inggit. Pagtatalo. Ang pangangalaga sa kanyang grupo. Ito ay natural sa tao. Ang mga Helenista at Hebreo ay bihag dito tulad natin. Alam ng mga alagad na ang pag-ayos ng mga alitan ay hindi nila kayang atupagin kasabay ng pagsalita tungkol sa Mabuting Balita. Kaya sila ay pumili ng mga katulong. Sila ay matagumpay kung ang pagbabasehan ay ang katotohanan na buhay pa ang Kristiyanismo ngayon.

Ang grupo mo ba ay nagkakawatak-watak? Baka oras na upang pumili ng lider na kayang pag-isahin ang grupo. Gumawa ng tulay, huwag maghiwalay. Victoria L.

Pagninilay: Paano mo hinaharap ang mga pagsubok?

Salamat, Panginoon. dahil ang mga pagsubok ay nagpapalago sa amin.

Kapag Gumuho Ang Haligi

Ang Mga Gawa 5:34-4
Salmo 27:1, 4, 13-14
Juan 6:1-15

Madalas ay nakakarinig tayo ng mga kwento tungkol sa mga pari at mangangaral na nasangkot sa sex scandals. Ito ay nagiging dahilan kung bakit maraming tao ang nawawalan ng tiwala sa mga namumuno maging sa loob ng simbahan. Minsan ito rin ang nagbibigay daan upang mawalan ng pananampalataya at tuluyang umalis sa simbahan. Mahirap paniwalaan ang mga namumuno sa simbahan na nag-aabuso ng kanilang kapangyarihan at magtulak sa iba ng magkasala.

Atin bang naalala na ipanalangin ang mga namumuno sa ating simbahan, upang ang kapangyarihan ng Diyos ang magwagi? Bagamat totoo na walang ganap na simbahan, kung ang Diyos ang naghahari, hindi mapipigilan ang pagkilos Niya sa simbahan at ganun din sa mga namumuno. Ang mga grupong itinatag ng tao ay mawawasak dahil sa kanila ngunit ang itinatag ng Diyos ay mananatili kahit wala na ang mga namumuno. Jane G.

Pagninilay: Naaalala ba natin na ipagdasal ang namumuno sa ating simbahan?

Panginoon, pagpalain mo ang aming simbahan at ang mga namumuno at Iyong linisin ang kanilang kaisipan at intensiyon.

Maghiganti O Di Maghiganti

Ang Mga Gawa 5:27-33
Salmo 34:2, 9, 17-18, 19-20
Juan 3:31-36

Ang kaibigan ko ay nagkaroon ng malungkot na karanasan sa kanyang organisasyon.

Hindi siya masaya sa mga nabotong mga opisyal pero pagkatapos nito, inatasan siya ng presidente na maging treasurer. Tinanggihan niya ito, ngunit sa pagpupumilit ng presidente at para na rin sa kapakanan ng pagsasamahan ay pumayag na rin siya.

Pero isang linggo bago ang panunumpa, kinausap siya uli ng presidente para sabihin na hindi pumayag ang mga council members na siya ang maging treasurer. Nagalit ang kaibigan ko pero nalampasan niya ito matapos ang maraming panalangin, suporta ng kaibigan at spiritual direction. Ngunit alam niyo ba na nilapitan siya uli ng presidente na maging treasurer dahil wala silang ibang makuha?

Iminungkahi ko sa kanya na laging manalangin at hayaan na ang Diyos ang magdesisyon. Higit sa pagmamalaki at paghihiganti, mas makakabuti ang makinig sa tinig ng Diyos sa kaibuturan ng ating puso. At anuman ang sabihin Niya ay dapat nating sundin. Cristy G.

Pagninilay: Meron bang humahamak sa iyo? Kaya mo ba siyang mahalin?

Nawa'y marinig ko ang Iyong direksiyon, lalo na sa mga panahon na ang isipan ko ay nababalot ng galit.

Albert

Ang Mga Gawa 5:17-26
Salmo 34:2-3, 4-5, 6-7, 8-9
Juan 3:16-21

Siya ang paboritong anak ng kanyang nanay at naging pasaway dahil dito. Sa mata ng kanyang ina, tama lahat ang ginagawa ni Albert. Nag-asawa si Albert sa edad na 17. Nabuntis at pinakasalan niya ang 15 taon na dalaga. Matapos magkaroon ng tatlong anak, nanganib na mawasak ang pamilya nila.

Tuloy pa rin ang paglalasing, kalokohan at pag-uwi ng madaling-araw ni Albert kahit na siya'y may asawa't anak na. Madalas magsumbong ang asawa niya sa biyenan. Pero sa huli sabi sa kanya, "Mabuti siyang lalaki na napasama lang sa masamang barkada. Patawarin mo na siya. Darating din ang araw na magbago din siya dahil mahal siya ng Diyos.

Nakalipas ang 20 taon. Lumaki na ang mga bata at nagkaroon ng kanilang mga pamilya. Mahigit limang taon lamang ang pagsasama ng kanilang magulang. Pero ngayon ang tatay nilang si Albert ay nagsisilbi sa Diyos ng fulltime, nagpapahayag sa mga tao kung paano siya minahal ng Diyos, na binigay niya ang bugtong anak para magligtas siya sa kasalanan. Chelle C.

Pagninilay: Minsan kailangan lang nilang malaman na may naniniwala sa kabutihan nila.

Salamat po, Ama, dahil hindi Ka nagsasawa sa akin.

Ang Tarangkahan At Ang Masasayang Tao

Ang Mga Gawa 4:32-37
Salmo 93:1ab, 1cd-2, 5
Juan 3:7-15

Habang papunta ang aking boss sa opisina, nakaranas siya ng mild stroke. Dinala siya sa ospital at doon siya'y nag-agaw buhay. Nakita na lamang niya ang kanyang sarili sa harap ng tarangkahang napapaligiran ng mababangong bulaklak. Nakakita din siya ng mga tao na tila kay saya. Isa sa mga kaibigan niya ay nakatayo kasunod niya, at nakatingin din sa mga tao doon.

Nabuhay ang boss ko at nalaman niya na ang kaibigang nakita niya sa kanyang pangitain ay inatake din at nabuhay. Noong magkita sila muli, ang suot ng kanyang kaibigan ay kapareho nung kasuotan niya sa may tarangkahan.

Ano ang lugar na iyon? Langit kaya? Maaari nga, dahil ang ebanghelyo ang nagsasabi na mayroong buhay na walang hanggan at kung itataas natin ang Anak ng Tao, tayo ay mabubuhay na masaya habang buhay. Ang pagtataas kay Kristo ay nangangahulugan na pagtanggap sa Kanya bilang sariling tagapagligtas, pagsamba, pagsunod, at pamumuhay na banal, hanggang sa kunin niya tayo upang makibahagi sa walang hanggang kasiyahan kasama Niya. Cindy S.

Pagninilay: Ano kaya ang itsura ng langit?

Panginoon, tulungan Mo akong mamuhay ng banal, upang maging karapat-dapat ako sa langit.

Pinanganak Muli

Ang Mga Gawa 4:23-31
Salmo 2:1-3, 4-7, 7-9
Juan 3:1-8

Si Tristan, ang aking limang-taong gulang na inaanak, ay nagsabi sa kanyang Ina, "Mama, gusto kong bumalik sa iyong tiyan."

"Hindi ka na magkakasya." nakangiting tugon ng ina niya.

"Pero kung hihiwain kitang maliliit na piraso at kakainin kita, mapupunta ka muli sa loob ng aking tiyan!"

"Sige! Simulan natin dito, tapos dito at tapos dito..." nagsalita si Tristan.

Ay, napaka-cute niya talaga! Ngunit kung iyon ang paraan upang mabuhay muli, hindi ako nakakasigurado na may papayag. Sa mabuting balita ay naghanda ang Diyos ng mainam na paraan upang mabuhay tayong muli ng walang sakit na mararamdaman. Sa pamamagitan lamang ng pagpahid ng langis at tubig at, voila! ikaw ay nabinyagan na at nabuhay nang muli.

Sandali lang, hindi lang pala iyon. Nakalimutan ko, maliban sa mga salita at mga ritwal, na ang mas mahalagang bagay ay ang pagtalikod sa kasalanan at manumbalik sa Panginoon. Maaari itong mangyari kahit anong oras, saan mang lugar, at sa lahat ng pagkakataon.

Ngayon, ipikit mo ang iyong mga mata at manalangin sa banal na Espiritu at mabuhay muli sa pagkakataong ito. Cecille L.

Pagninilay: Muli bang nabago ang aking commitment sa Diyos?

Pumasok Ka sa aking puso, Panginoon.

Pagtitiwala

Ang Mga Gawa 5:12-16
Salmo 118:2-4, 13-15, 22-24
Pahayag 1:9-11, 12-13, 17-19
Juan 20:19-31

"Alam ko na hindi pa kita nabibigyan ng ganitong uri ng gawain, ngunit alam ko kaya mo ito," sabi ng editor ko sa akin.

Sinabi niya sa akin na ang kanyang boss ay nangangamba nang ako ang inatasan niya dahil nagkaroon sila ng di kanais-nais na karanasan mula sa dating manunulat.

Pagkalipas ng ilang buwan, ipinasa ko ang trabaho ko. Tapos, nakatanggap ako ng email mula sa aking editor. "Humanga sila sa iyong gawa. Salamat!" sabi niya.

Gumaan ang aking loob at naisip kong palagay rin ang kalooban ng mga boss ko. Mahirap magtiwala sa hindi mo kilala at umasa sa salita ng iba.

Mas madali di hamak ang magtiwala sa Diyos kaysa sa ibang tao. Gayunpaman, hindi ko mapigil na mag-alala sa araw-araw.

Kung alam natin na ang Diyos ang nagbibigay ng ating mga pangangailangan, pinapagaling, pinapatawad at minamahal tayo - mahirap pa bang ipagkatiwala sa Kanya ang lahat? Anna dG.

Pagninilay: Ano ang humahadlang sa iyong magtiwala sa Diyos ng lubusan?

Panginoon, turuan Mo ako na ipasa-Inyo ang lahat.

Paninindigan

Ang Mga Gawa 4:13-21
Salmo 118:1, 14-15, 16-18, 19-21
Marcos 16:9-15

Sumikat sa buong mundo ang isang pambatang aklat anim na taon ang nakalipas. Dahil dito, napukaw ang interes ng mga bata sa Amerika ukol sa pangkukulam. Nagkasundo kaming mag-asawa na ang aklat na ito ay hindi kaakit-akit sa Panginoon. Ipinaliwanag namin sa anak naming nasa Grade 1 kung bakit hindi niya ito dapat basahin o panoorin sa sine.

Kaya noong naging Grade 4 siya at kinailangan niyang basahin ang librong ito para sa eskwela, nadismaya ako. Nakiusap ako sa mga namamahala kung pwedeng iba na lang ang ipabasa sa anak ko at ipinaliwanag ko kung bakit. Hindi sila pumayag. Susuko na sana ako ngunit nanaginip ako noong gabing iyon. Tila bigo ang Panginoon na agad akong sumuko.

Kinabukasan, kinausap ko ang director ng eskwela at sabi ko na baka dumating ang araw na nangangailangan manindigan ang aming anak at at maaalala niya yung panahon na bumitaw ang kanyang magulang sa kanilang paniniwala dahil sa tindi ng pagsubok. Pagkalipas ng isang buwan, pumayag silang palitan ang libro para sa aming anak. Noong sumunod na taon, tinanggal na yung libro sa listahan ng babasahin ng paaralan. Ronna L.

Pagninilay: Kaya mo bang manindigan para kay Hesus kahit mahirap?

Bigyan Mo ako ng lakas, Hesus, na manindigan para sa Iyo.

Mga Sandali Ng Pagpapala

Ang Mga Gawa 4:1-12
Salmo 118:1-2, 4, 22-24, 25-27
Juan 21:1-14

Pagod na ang mga kasamahan ko sa grupo; hating-gabi na at hindi pa matapos ang aming presentasyon. “Bakit ko nga ba sila tinutulungan? Hindi naman inutos sa akin ito ng boss ko!”

Aayaw na sana ako.

Maaring ganito rin ang naramdaman ni Pedro nang sabihin niyang, “Mangingisda ako.” Sa kasamaang palad, wala silang nahuli! Handa na siyang sumuko.

Buti na lang bago tayo sumuko, binibigyan tayo ng Diyos ng panahon na huminahon, magpahinga at sumubok muli.

Nabasa natin ang kwento: Sinabi ng Panginoon kay Pedro na huwag sumuko at magsumikap muli. At ang dami nilang isdang nahuli! Higit pa dito, kumain sila ng almusal na kasama si Hesus at nanatili sa Kanyang piling.

Naramdaman ko ang grasya ng Diyos nang binigyan ng parangal ang aming proyekto para sa aming kumpanya. Nakamtan namin ang biyaya ng Diyos sa aming presentasyon. Ariel D.

Pagninilay: Huwag kang susuko. Bumalik ka sa Diyos.

Salamat po, Ama, grasya ng bawat sandali.

Ang Ama Ng Lahat Ng Panahon

Ang Mga Gawa 3:11-26
Salmo 8:2, 5, 6-7, 8-9
Lucas 24:35-48

Tunay nga na ang buhay ay paikut-ikot lang. Kahapon tayo's mga estudyante at ngayon mga propesyonal na.

Dati tayo'y mga kabataan sa henerasyon "Yeah Yeah Vonnel." Ngayon, tayo'y mga magulang o lolo't lola sa henerasyon ng dot.com.

Ngunit di mahalaga kung tayo'y matanda man o bata; ang Diyos ay nananatiling nariyan. Pareho Siya noon, bukas at magpakailanman.

Oo, Siya nga ang Ama nating mahabagin at mapagpatawad habang tayo ay lumalapit sa Kanya ng may pagpapakumbaba, humihingi ng tawad sa mga pagkakamali at kasalanang nagawa.

Palagi Niya tayong patatawarin gaano man karami ang ating nagawang kasalanan.

Salamat po, Panginoon, sa pagpapatawad Mo sa lahat ng aking kasalanang nagawa. Ikaw nga ang Ama ng Lahat ng Panahon. Henry Y.

Pagninilay: Ilang beses na ba akong nagbingi-bingihan tuwing kinakausap Mo ako?

Panginoon, patawarin Mo ako sa lahat ng nagawa kong labag sa Iyong mga turo.

Matatag Ba Ang Pananampalataya Mo?

Ang Mga Gawa 3:1-10
Salmo 105:1-2, 3-4, 6-7, 8-9
Lucas 24:13-35

Noong sinabi ng doktor na walang lunas ang sakit sa puso ng aking anak, matindi kong sinuyo ang Panginoon. Dahil doon, nagpakilala ang Panginoon sa akin sa mga paraan na hindi ko inaasahan simula pa noong nanahan ang Espiritu Santo sa akin 20 taon nang nakakaraan. Sigurado ako na magmimilagro ang Diyos at papagalingin Niya ang aking anak para sa Kanyang kaluwalhatian.

Pagkalipas ng limang buwan, namatay ang aking anak. Nabigla ako. Pakiramdam ko nilinlang Niya ako. Akala ko ba Panginoon at Tagapagligtas Siya? Bakit hindi Niya napagaling ang anak ko? Bigla akong nagduda kung totoo ang sinasabi ng Biblia tungkol sa Kanya. Lumuhod ako at sinabi sa Kanyang hindi ako aalis hanggang masumpungan ko ang katotohanan tungkol sa Kanya.

Pagkalipas ng isang linggong pag-aalinlangan, nagising ako sa katotohanan. Tunay nga Siyang Diyos at Dakilang Manggagamot. Hindi man Siya nagpakita sa akin, nagising naman ako sa bagong umaga na mapayapa ang puso ko. Sa kaibutaran ng aking sarili, alam kon tunay nga Siya. Ronna L.

Pagninilay: Gaano katatag ang iyong pananalig sa Kanya?

Panginoon, gusto kitang makilala.

Ipamahagi Ang Salita

Ang Mga Gawa 2:36-41
Salmo 33:4-5, 18-19, 20, 22
Juan 20:11-18

Ayaw kong maniwala sa mga sinasabi ni Dan Brown tungkol kay Hesus at Maria Magdalena. Kasinungalingan 'yon! Ngunit naniniwala ako na malapit ang loob ni Maria Magdalena kay Hesus. Dahil sa kanya unang nagpakita si Hesus.

Bakit sa kanya? Dahil si Maria ay naghihintay sa Kanya sa labas ng libingan samantalang lahat ay umuwi na (Juan 20:10-11). Sinabi niya, "Nakita ko ang Panginoong Hesus!" at ipinamalita ang sinabi Niya.

May mga bagay na dapat ilihim sa iba at merong mga dapat ipaalam. Madalas may nagsasabi, "Pinagpapala ako ng Panginoon pero hindi ko nalang pinagsasabi at baka isipin ng iba na nagyayabang ako." O kaya, "Naghimala ang Diyos sa buhay ko ngunit baka isipin nila na nababaliw ako kaya mananahimik lang ako."

Tungkulin natin na ipahayag si Kristo. Humayo tayo at ibalita sa buong mundo ang tungkol kay Hesus. Tulad ni Maria Magdalena, kung nais natin makita si Hesus, hintayin natin Siya, manatili sa Kanya, at ipamahagi ang salita ng Diyos. Sabihin natin, "Nakita ko ang Panginoon. Siya ay buhay!" Alvin B.

Pagninilay: Ikaw ba ay nag-aalinlangan na ipamahagi ang ginawa ng Diyos sa buhay mo? Subukan mong sabihin ang tungkol sa Kanya ngayon.

Hesus, aking Panginoon, punuin Mo ako ng Inyong grasya upang makita Kita at maihayag Ka sa iba. Amen

Walang Ilaw

Ang Mga Gawa 2:14, 22-32
Salmo 16:1-2, 5, 7-8, 9-10, 11
Mateo 28:8:15

Galit sa brownout ang aking mga anak. Nanginginig sila sa takot, namamawis ang mga palad at kinakabahan. Syempre medyo exaggerated iyon. Ngunit ang totoo ay ayaw nilang mawalan ng ilaw kahit sandali lalo na kung sila ay nanonood ng TV o kaya'y nagbabasa ng komiks.

Pero mainam ito dahil ako'y hinahanap nila, "Mama! Nasaan ka?" Kapag narinig nila ang aking boses, tila magic sa kanilang pandinig. Kapag nilapitan na nila ako, hinahawakan ko ang kanilang kamay at niyayakap ko sila ng mahigpit at sinisigurado ko sa kanila na okay na ang lahat dahil nandito na si Mama. Ah! Kaya ko gusto ang brownout.

Naiisip ko tuloy kung ano ang pakiramdam kapag nasa langit na tayo. Nabubuhay tayo sa liwanag at ang pinakamaganda sa lahat, niyayakap tayo ng Diyos ng mahigpit at nagsasabing, "Okay na ang lahat; narito Ako sa iyong tabi."

Nang si Hesus ay nabuhay muli, inalis na Niya ang brownout. Marissa E.

Pagninilay: Gusto mo bang manatili sa kadiliman o sundan ang liwanag ng pagmamahal ng Panginoon.

Ibigay Mo ang Iyong liwanag at katotohanan. Maging gabay ko sila. Dalhin Mo ako sa Iyong banal na bundok kung saan ako ang manatili sa Iyo.

Dalawang Simpleng Tanong

Ang Mga Gawa 10:34, 37-43
Salmo 118:1-2, 16-17, 22-23
Colosas 3:1-4 o 1 Corinto 5:6-8
Juan 20:1-9

Si Ms. Prosti, Denial King at si Mr. Hot Head. Hindi sila mga baguhang cartoon karakter. Sila ay si Maria Magdalena, Pedro at Juan - ang mga "Reyna at Hari ng Sablay" na mga naunang nakasaksi sa pinakamahalagang pangyayari sa buong mundo.

Bakit sila? Hindi ako theologian. Isang simpleng guwapong lalake lang ako (Naku, bakit humahaba ang ilong ko?) na may isang simple at gwapong sagot: Sila ang mga nauna dahil nandoon sila!

Maaaring minabuti ni Hesus na sina Ponsio Pilato, Herodes at Caiaphas ang mauna para makita nila ang katibayan, ngunit wala sila doon. Maaaring umasa Siya na ang mga Pariseo ang makakita sa Kanya, pero hindi sila dumating. Kung hindi lang sana nagbigti si Hudas, baka sinabihan siya ni Hesus, "Wala akong pakialam sa
iyong nakaraan at sa mga kasalanan mo, basta nandito ka!"

Bakit umaga nangyari? Dahil sa pagsisimula ng isang bagong araw, binago din niya ang lahat sa buhay natin! Ang pagsikat ng araw ang naghiwalay ng ating kahiya-hiyang nakaraan sa ating matagumpay na hinaharap!

Ang batong nasa bukana ng libingan ng iyong mga pagkakamali at mga kasalanan ay natanggal na. Jon E.

Pagninilay: Nandoon ka ba kung saan ka dinala ni Hesus?

Panginoon, ako ay makasalanan, galit, nahihiya, takot, at walang pag-asa. Pero nandito ako. Buhayin Mo ako.

Sugatang Nagpapagaling

Genesis 1:1 - 2:2
Salmo 118:1-2, 16-17, 22-23
Mga Taga Roma 6:3-11
Lucas 24:1-12

Pauwi na kami mula sa isang masayang pagtitipon noong kaarawan ng asawa kong si Obet. Buntis ako noon. Nakasakay kami sa taksi nang maramdaman ni Obet na gumalaw ang aking tiyan. "Sumisipa ba ang aking baby?" tanong niya. "Palagay ko gusto ka lang niyang batiin," tugon ko. Umiiyak si Obet sa tuwa nang mapansin niya na nakatulog ang drayber ng taksi. Ginising niya ito, humingi ng paumanhin ang drayber at nagpaliwang na napagod siya buong maghapon sa pagmamaneho. Nagalit si Obet ngunit pinagpasensyahan niya ito. Sa pagkakataong iyon, sinamantala niyang maibahagi ang Magandang Balita sa drayber.

Makalipas ang limang araw, nagpa-ultrasound ako. Nagulat kami sa resulta: Mayroong palcenta at amniotic fluid ngunit walang baby. Blighted ovom daw. Napaiyak si Obet at nagtanong, "Kung walang baby, ano yung naramdaman ko na gumalaw sa iyong tiyan?" Ang sinabi ko na lang, "Gumalaw ang ating baby upang iligtas tayo sa tiyak na kapahamakan."

Isang himala ang pagkaligtas namin sa aksidente. Dahil dito, nakakatulong kami sa mga nakukunan. Nakatutulong kami dahil naiintindihan namin kung ano ang nararamdaman nila. Joie C.

Pagninilay: Hinahanap ko ba ang mga buhay sa piling ng mga patay?

Gamitin Mo ako, Hesus, upang bigyang pag-asa ang nangangailangan sa Iyo.

Inuman Ang Saro Ni Hesus

Isaias 52:13-53:12
Salmo 31;2, 6, 12-13, 15-16, 17, 25
Hebreo 4:14-16; 5:7-9
Juan 18:1-19:42

Akala ko na ang kabaligtaran ng pag-ibig ay pagkamuhi. Pero sa aking karanasan, kahit matindi ang galit, may mananatiling pag-ibig pa rin sa puso ng isang tao. Kaya may kasabihan, "the more you hate, the more you love."

Natutunan ko kay Scott Peck, ang mga akda ng The Road Less Travelled, na ang tunay na kabaligtaran ng pag-ibig ay hindi pagkamuhi kundi katamaran. Kapag ang isang tao ay wala nang pagmamalasakit sa iba, iyon ang matatawag na kabaligtaran ng pag-ibig.

Ang mga taong walang pakialam ganito mag-isip: "Magsaya ngayon at bukas magtiis." Pero iba ang prinsipyo namin ng aking asawang si Joie: "Magtiis ngayon at bukas magsaya." Kahit na mahirap, patuloy lang kami na tumutulong, nakikinig at nagpapahalaga sa isa't-isa. At sa paglipas ng mga araw, buwan, at taon, doon namin mararanasan ang tunay na kasiyahan.

Sang-ayon ako sa sinabi ni Dr. Peck: "Ang kabutihan ng ating katauhan... ay lumalabas kapag tayo ay hindi kumportable, malungkot at may dalang pasanin." Gusto ba natin ang madaling daan ng walang pakialam o ang mahirap na daan ng tunay na pag-ibig? Uminom sa saro ngayon at magsaya! Obet C.

Pagninilay: Nakikita ba natin ang kaluwalhatiaan sa kabila ng pagdurusa?

Hindi ang aking kalooban, ngunit ang kalooban Mo ang mangyari, Panginoon.

Ang Paghuhugas Ng Ating Mga Paa

Exodo 12:1-8, 11-14
Salmo 116:21-13, 15-16, 17-18
1 Corinto 11:23-26
Juan 13:1-15

Sa aming community ay may mahalagang tradisyon na tinatawag na "washing of the feet." Ang isang miyembro ay pinapaupo habang siya ay "huhugasan" ng mga salita ng pagmamahal. Sasabihin namin ang kanyang mga katangian - kung paano niya hinipo ang aming buhay. Kadalasang maraming umiiyak.

Kahit sino naman ay mabubuhayan ng loob sa mga salita ng pag-ibig at pagmamahal.

Ngayon naaalala ko ang sobrang pagmamahal na ibinuhos ng Panginoon noong huling hapunan. Tumayo Siya at hinubad ang mga panlabas na pananamit, kumuha ng tuwalya at tinali ito sa Kanyang baywang. Sa paghugas ng bawat maduming paa ng Kaniyang apostoles nagbigay Siya ng halimbawa sa kanilang lahat. "Kung ano ang ginagawa Ko ay hindi ninyo naiintindihan ngayon pero maiintindihan niyo rin kalaunan...."

Isang bahagi lang ito ng malalim na pagmamahal ni Hesus para sa atin. Mga salita ng pagmamahal. Mga gawain ng pag-ibig. Lagi nating isipin kung paano tayo lalong makapagbibigay nito. Lallaine G.

Pagninilay: Mapagmahal ba ang aking salita at gawa?

Linisin Mo ako, Panginoon! Nawa'y ang tubig ng buhay na umagos sa akin ang magturo sa aking magmahal. Amen

Mga Salitang Dapat Isabuhay

Isaias 50:4-9
Salmo 69:8-10, 21-22, 31, 33-34
Mateo 26:14-25

Ikaw ba ay nag-aalala? Ikaw ay dakila sa paningin ng Diyos! Sabi sa Mateo 6:25-26, "Kaya't sinasabi ko sa inyo: Huwag kayong mabagabag tungkol sa pagkain na kailangan ninyo upang mabuhay, o sa damit na kailangan ng inyong katawan. Hindi ba't ang buhay ay higit na mahalaga kaysa sa pagkain, at katawan kaysa sa pananamit? Masdan ninyo ang mga ibon: Hindi sila naghahasik ni nag-aani o kaya'y nagtitipon sa bangan. Gayunpaman, pinakakain sila nang inyong Amang nasa langit. Hindi ba't higit kayong mahalaga kaysa sa mga ibon?"

Ikaw ba ay nalugi? Ikaw ay mayaman higit sa iyong nalalaman! Sabi sa Juan 15:5, "Ang mananatili sa akin at ako sa kanya ang siyang namumunga ng sagana."

Ikaw ba ay pagod? Pagpapahingahin ka ni Kristo! Sabi sa Mateo 11:28, "Lumapit kayo sa akin, kayong lahat na napapagal at nabibigatan sa inyong pasanin, at kayo'y pagpapahingahin ko.

Ikaw ba ay takot? Mahal ka Niya! Sabi sa 1 Juan 4:18, "Pinapawi ng pag-ibig ang anumang pagkatakot."

Kahit ano pa man ang dinadaanan mong suliranin, may sagot ang Panginoon sa Kanyang Salita para sa iyo. Arun G.

Pagninilay: Ako ay mahalaga sa Diyos; mahal Niya ako.

Panginoon, nawa'y ang aking mga salita ay magdala ng buhay sa mga nakakarinig nito.

Puting Martir

Isaias 49:1-6
Salmo 71:1-2, 3-4, 5-6, 15, 17
Juan 13:21-33, 36-38

Dati, mayroon akong isang dekorasyon na nakasabit sa taas ng aking lamesa sa opisina. Nakasula doon: "Christ died for me. I live for Him." Ito ay isang paalala sa akin kung paano ako dapat mamumuhay araw-araw. Sa tingin ko, mas madali siguro kung "Christ died for me. I will die for Him" ang nakasulat. Ang kamatayan ay minsanan lang pero ang mabuhay ay mahabang proseso!

Turo ng simbahan sa atin na ang mga "pulang martir" - yung mga namatay dahil sa kanilang pananalig - ay diretsong langit ang punta. Konti lang ang matatawag na magpapatunay sa ganitong paraan. Ang karamihan sa atin ay tinatawag na maging "puting martir." Maaaring sa pag-alis ito sa isang magandang trabaho upang maglingkod ng fulltime sa Panginoon. Maaring sa pagbibigay ng malaking donasyon sa mga nangangailangan. Anuman ito, hindi lang ito minsanang ginagawa natin kundi sa araw-araw.

Hindi nauunawaan ni Pedro noong una kung ano ang ibig sabihin ng pagbibihay ng kanyang buhay para kay Kristo. Kaya ang bilis niyang itinanggi si Hesus ng tatlong beses. Pero nagsisi siya at ginamit ang buong buhay niya para bawiin ang paglaglag niya kay Hesus. Sa bandang huli, namatay pa siya bilang pulang martir. Rissa S.

Pagninilay: Paano ako mamumuhay kay Kristo ngayon?

Panginoon, bigyan mo ako ng grasyang mamuhay para sa Inyo araw-araw.

Nakakaawang Marta

Isaias 42:1-7

Salmo 27:1, 2, 3, 13-14

Juan 12:1-11

Ako ay nahahabag sa mga babaeng ang pangalan ay Marta. Ang ebanghelyo ngayon ay nagdulot ng reputasyon na hindi sila madasalin at inggitera pa.

Pero ako ay isang Marta at gusto kong sabihin na masaya akong maging ganito. Ako ang tipong makikita mong nagsisilbi at hindi nakaluhod. Ako ang tipong makikita mong nagtatadtad ng litson hindi tulad ng host na nakikipag-usap sa kanyang mga bisita.

Hindi ibig sabihin na hindi ako nagdadasal. Pero para sa akin, ang pagsisilbi sa iba ay ebidensiya ng aking pagmamahal. At ano ba ang dasal kung pagpapahayag ng pagmamahal?

Gayun pa man, ang pagiging Marta ay may negatibo ring aspeto, tulad ng pagiging isang Maria. Bilang isang Marta, kailangan kong tanggapin na ang galing ko ay nasa mga trabaho na hindi nakikita ng karamihan. Ang kahinaan ko naman ay minsan, naiinggit ako sa mga taong nasa harapan.

Pero habang tumatagal, lalo kong natatanggap na para sa mga di-pansing gawain ang kakayahan ko. Mula noon, masaya na ako na isa akong Marta. Victoria L.

Pagninilay: Martam, Marta, Marta. Tumigil ka. Alamin mo kung sino kang talaga at tanggapin iyon. Hayaan mo si Maria sa kanyang gawain.

Panginoon, kapag ako'y abala sa napakaraming bagay, patigilin mo ako at paalalahanang manahimik sa Iyong presensya.

Gamitin Ang Lamesa

Isaias 50:4-7
Salmo 22:8-9, 17-18, 19-20, 23-24
Filipos 2:6-11
Lucas 22:14-23:56

Ako ay naniniwala na ang hapag-kainan ay banal na lugar.

Halimbawa, lumalabas kami ng aking asawa para sa isang "romantic date" isang beses sa isang linggo. (Kahit sa simpleng kainan o sa garahe man ay pwede na.)

Napakaraming himala, pagpapagaling at mga kamangha-manghang pangyayari dahil sa hapag-kainan.

Sa hapag-kainan naipahahayag naming mag-asawa ang aming nararamdaman. Ibinubuhos namin ang aming alalahanin, pag-asa, takot at layunin sa isa't isa. (Madalas kasi, ang mga mag-asawa ay naghuhubad ng pisikal ngunit nakabalot ang kanilang mga damdamin.)

Sa hapag-kainan pinalalalim ko ang aking relasyon sa aking anak. Lumalabas rin kaming dalawa lang at kumakain ng paborito naming pagkain. Kami'y nag-uusap, nagkukuwentuhan, nagtatawanan at umuuwing masaya.

Dito so banal na lamesa nahuhubog ang pagkakaibigan, ang pagiging mag-asawa at ang relasyon ng magulang at anak.

Ginagamit mo ba ang lamesang ito upang pagpalain ang iyong buhay? Simulan mo ngayon. Bo S.

Pagninilay: Kunin mo ang iyong kalendaryo at maglaan ng araw upang ilabas mo ang iyong asawa, anak at magulang.

Panginoon, gusto ko ang matibay na relasyon sa mga minamahal ko.

IN or OUT

Nakakalungkot isipin na sa kapanahunan natin ngayon ay lantad na lantad na ang mga bagay na dati ay ipinakakatagu-tago para huwag mabisto o mahayag sa mga tao.

Noong ako ay nasa Women's Correctional pa, ang ayaw na ayaw ko ang may makasamang "magkarelasyon" sa dorm.

Lalo naman akong sinusubukan kasi nang maging squad leader ako, natalaga ako sa maraming "magkaka-partner."

"Diyos ko! Takpan N'yo po sila para huwag silang makita at magkasala ang mga makakakita sa kanila at mga makakarinig sa mga ginagawa nila," usal kong dalangin habang ako ay nag-ra-round sa paligid ng dorm sa alanganing oras ng gabi.

"Baliktad yata ang dasal ko, Lord?!" muli kong usal.

Tunay nga na hindi lahat ng "uso" ay dapat na gayahin o tangkilikin gaya ng lesbianism at homosexuality.

Lalo tayong manalangin na nawa'y huwag nang maulit pa ang pagkagunaw ng Sodom at Gomora - nawa'y huwag na tayong gumawa ng kasuklam-suklam na bagy na hindi kanais-nais sa paningin ng Diyos. Beth C.

Pagninilay: Kapatid, nilikha kang lalaki o babae ng Diyos: Walang gitna. Magpakatotoo ka na nang hindi ka ma-OUT sa langit.

Panginoong Hesus, ituwid Mo po ang pusong nag-aalinlangan sa tunay nilang kasarian nang maituwid ang liko nilang pamumuhay.

Paghagis Ng Bato

Maraming beses na akong naghagis ng bato. Ang masaklap pa, ang binabato ko ay si Hesus, ang aking kapwa, at minsan, maging ang aking sarili.

Ang mga malalaking batong inihagis ko ay ang di ko pagtitiwala sa Diyos, paghahari-harian sa buhay ko, pagwawalang-bahala sa pamilya, at di pagkalinga sa mga nangangailangan. Isa sa pinakamalaking batong ipinukol ko ay ang bato ng kayabangan at pagmamataas. May mga bato akong katamtaman ang laki: ang di ko pagiging tapat sa aking relasyon sa Diyos, paninirang-puri sa kapwa, at pagiging waldas. Marami rin akong ipinukol na mga maliit na bato tulad ng di pagsasabi ng buong katotohanan at di pagtupad sa mga pangako.

Anumang laki o liit ng mga batong ito, lahat ay lubhang nakakasakit kapag ipinukol ko na sila. Nangingilabot akong isipin kung gaano ko na nasaktan si Hesus at ang mga taong mahal ko.

Pero hindi pa rin Niya ako iniiwan. Naghihintay pa rin Siya na ang ihagis ko sa Kanya ay mga bulaklak ng mabuting gawain. Tess VA.

Pagninilay: May pangalan ba ang mga bato mo?

Tulungan N'yo ako, Panginoon, na huwag gamitin ang mga bato para saktan Kayo at ang Iyong mga minamahal, pati na ang sarili ko.

Ingatan Ang Pananalig

Noong nasa kolehiyo pa ako, meron kaming requirement sa Basi Accounting na ang tawag ay Practice Set. Ang Practice Set ay binubuo ng iba't-ibang klaseng mga dokumento ng accounting. Kailangan naming isulat sa talaan ang mga aktual na transaksyon at gumawa ng financial statement. Ang requirement na ito ay basehan ng aming final grade.

Hindi madaling gawin ang Practice Set pero di rin naman siya gaanong mahirap. Natapos ko siya nang maaga at may mga kaklase ako na nagpatulong kumpletuhin ang kanila. Okay lang naman sa akin na tumulong, pero may isa akong kaibigan na gustong kopyahin ang buong Practice Set ko! Aba, hindi nga ako pumayag.

Nagalit siya nang husto sa akin dahil dito.

Para makapasa, kailangan paghirapan ito. Hindi tayo mabibigyan ng magandang marka kung di natin gagawin ang hinihingi sa atin. Ang Diyos man ay gumawa ng kasunduan sa mga Israelita. Sa Genesis 17:4-8 sinabi Niya kung ano ang gagawin Niya para sa kanila kapag tinupad nila ang kanilang papel. Tayo ang mga bagong pinili ng Diyos. Ginagawa ba natin ang dapat? Judith C.

Pagninilay: Ano ang pwede mong gawin ngayon para magkaroon ng mabuting epekto?

Nawa'y mabigyan Ninyo ako ng magandang marka sa karera ng buhay.

Maling-mali

May kaibigan ako - itago natin siya sa pangalang Natasha. May sikreto siya ipinagtapat sa akin at kabilin-bilinan niya huwag kong ipagsasabi sa iba. Natupad ko naman ang pangako ko... nang panandalian. Pero nung tanungin ako ng isa pang kaibigan namin tungkol dito, inakala kong may alam rin siya kaya't nagkwentuhan na kami. Mali!

Nang mapag-isipan ko ang nagawa ko, nagkunwari akong wala akong ginawang mali, kasi magkaibigan naman kaming tatlo. Sabi ko sa sarili ko na di naman magagalit si Natasha. Mali na naman!

Kalauna'y napatawad na rin ako ni Natasha, ngunit nahirapan akong maniwala na kinalimutan na niya ang ginawa ko.

Ganito ako kapag nakakagawa ng kasalanan. Alam ko namang may kahihinatnan ang kasalanan ko...at alam ko ring patatawarin ako oras na magsisi. Ngunit ang una kong reaksyon ay pagwawalang-bahala o kaya'y matinding "guilt," mga damdaming di ko gusto. Pakiramdam ko'y inililista ng Panginoon lahat ng kasalanan ko, at gaya ko, hindi Niya makakalimutan ang mga ito.

Diyan ako talagang maling-mali! Tina M.

Pagninilay: Alam mo bang pinalaya ka na ni Hesus?

Tulungan Niyo akong mahalin at patawarin ang aking sarili, tulad ng pagpapatawad Ninyo at pagmamahal sa akin.

Bilangin Ang Biyaya

Ang paggising natin sa umaga ay biyayang walang katulad...ito ay milagro.

Isipin natin, hindi ba't napakapalad natin na: Kaya nating maligo na may mainit at malamig na tubig sa gripo (habang may iba na nag-iigib pa); nakahanda na ang ating almusal (habang marami ang di pa malaman kung saan kukuha ng kakainin sa maghapon); may sarili tayong sasakyan (habang may mga taong naglalakad ng napakalayo para makarating sa pupuntahan); may mainit tayong makakain sa tanghalian (habang maraming nagtatrabaho sa init ng araw para kumita ng pera); nakakaidlip pa tayo sa hapon o nagkakape pa (habang marami ang hindi nakakakain at nakakapahinga); nakakauwi pa tayo sa gabi para maghapunan kasama ang pamilya at manood ng TV (habang ang ibang walang TV ay matutulog na lang para harapin ang isa na namang matinding araw ng kahirapan kinabukasan).

Talaga namang mapapalad tayo. Kaya bilangin natin ang ating mga biyaya sa halip na magreklamo. Henry Y.

Pagninilay: Binilang mo na ba ang mga biyaya mo ngayon?

Para sa mga panahon na nalilimutan namin Kayong pasalamatan at nagrereklamo pa, patawarin N'yo kami.

Kaibigan Nga Ba?

"Hindi ko sila mga kaibigan. Mga kapatid ko lang sila."

Nararamdaman ba ninyo ang panunuya sa mga salita ni Harold? Sino ba ang tinutukoy niya? 'Yung mga pinuno at ibang miyembro ng kanilang Catholic community. Ganito kasi yun. Bakla si Harold at naghahanap siya ng lugar kung saan wala siyang takot na ipakita ang lahat ng kahinaan niya. Akala niya, ang pagsali sa isang Catholic community ay makakatulong sa kanya na mabuhay ng banal. Subalit sa umpisa lang niya naramdaman ang pagtanggap ng grupo. Sa kalaunan, napapansin na nila na malambot siya, at kapag nagbabahagi siya kung gaano kahirap talikuran ang tukso, naiilang ang mga "kapatid niya sa Panginoon." Kaya lumalayo sila sa kanya. Minsan ay nakita pa niya na mag gumagaya sa pagsasalita at pagkilos niya. Nagpasya siyang tuluyang lisanin ang kanyang komuninad at magpakabakla na lang.

Ipinaaalala ng ating ebanghelyo ngayon na suriin natin ang mga itinuturing nating handog. Dahil nakakalungkot isiping "kapatid" lang ang turing sa atin at hindi kaibigan. Marahil ay labis tayong nakatuon sa mga panlabas na katangian, na nalilimutan na nating magmahal ng tunay. Tandaan nating ang isang "kapatid" ay dapat na higit na mapagmahal kaysa sa isang kaibigan. Roy M.

Pagninilay: Sino ang mga kapatid mo sa na kailangang-kailangan ng suporta?

Sa mga panahong nanghusga ako, patawarin Ninyo ako.

Mag-umpisa Muli

Hindi madaling magsimula muli. Kapag nawasak na ang buhay mo, mahirap pulutin ang mga natitirang piraso sa paligid at kalooban mo para sa muling bumuo. Dahil dito, marami sa atin ang hindi makatakas sa nakaraan. Nabubuhay tayo na puno ng puot, hinanakit at pagsisisi sa ating mga nagawa. Di tayo makawala sa paikot-ikot na di pagpapatawad - ng ating sarili at ng iba. Ang mga ito rin ang pumipigil sa atin para magpatuloy.

Ang mensahe ng Diyos sa atin ngayon ay isang mensahe ng pag-ibig at pag-asa. Mas dakila ang pag-ibig ng Diyos kaysa sa ating nakaraan. Mas malawak ang pananaw ng Diyos at kahit may mga mali tayong nagawa at may puot, nagagamit Niya ang mga ito - maging ang ating mga kalakasan - pagandahin at palaguin para sa ating buhay espiritwal.

Minsan, hinahayaan ni Hesus na tayo ay mabigo para mas mahalin Niya tayo. Kung perpekto na ang mga buhay natin, baka di na natin kailanganin si Hesus. At pagkatapos ng mga unos ng buhay, inaakay Niya tayo para ipakita ang kanyang bagong likha. Tunay ngang maganda! Coltics C.

Pagninilay: Anong bahagi ng iyong nakaraan ang hindi mo makalimutan? Hayaan mong pagalingin ka ng Panginoon.

Tulungan Niyo akong makita na hindi dinidikta ng nakaraan ko kung sino ako. Hayaan Niyo na gawin akong bagong likha ng Inyong pagmamahal.

Makinig!

Ahente ako ng isang insurance at pre-need plans. Isa sa mga inaalok kong bumili ay ang dati kong ka-opisina na si Ate Cindy. Inalok ko siya ng Life Plan. Gusto niyang kumuha pero di para sa sarili niya kundi para sa kanyang nanay na may malubhang sakit. Subalit wala pa siyang pera.

Isang araw, naisipan kong tumawag muli sa kanya. Baka naman kaya na niyang kumuha ng plan. Ngunit nabalitaan kong malala na ang kalagayan ng nanay niya. Naramdaman ko na hindi mainam na solusyon ang pagbili niya ng plan. Naramdaman ko na ang gusto ng Panginoon ay i-refer ko siya sa isang memorial chapel na may mga murang "at need" package.

Kinaumagahan, nagtext na si Ate Cindy. Yumao na ang kanyang ina. At dahil nakapag-usisa na siya sa memorial chapel bago ito nangyari, hindi na naging problema ang pag-aasikaso sa labi ng kanyang ina.

Dahil sa pangyayaring ito, natutunan ko na sa buhay - at sa negosyo - ang importante ay maging madaling makadama ng pangangailangan ng iba. Hindi sa laki ng kikitain natin kundi kung gaano tayong nagmahal ang pinaka-importante. Judith C.

Pagninilay: Nakikinig ka ba ng mabuti sa mga bulong ng Espiritu Santo?

Salamat sa paggabay Ninyo sa akin at sa pagiging instrumento ng Iyong paggabay sa ibang tao.

Pistang Bayan

Tuwing may pista sa bayan natin, iniimbita natin ang mga kaibigan, kamag-aral o katrabaho. Naglalagay pa tayo ng mga dekorasyon at nagluluto ng mga masasarap na pagkain. May mga palaro, at puno ng kasayahan at tugtugan ang araw na iyon.

Ngunit kadalasan, nalilimutan nating "pakainin" ang ating mga espiritu sa araw ng pista.

Hindi ba't ang dahilan kung bakit natin ipinagdiriwang ang pista ay para maalala ang buhay ng patron ng bayan at para pasalamatan ang Diyos para sa kanyang halimbawa?

Sa susunod na pista, subukan kaya nating mag-imbita sa ating bahay ng mga mahihirap nating kapitbahay o kaya'y mga batang palaboy. Ipagdiwang natin ang tunay na kahulugan ng pista. Sigurado ako na sa ganitong paraan, talagang makikipista si Hesus sa atin. RosAnn J.

Pagninilay: Habang tayo ay nakikipista, huwag nating kalimutan ang dahilan ng pagdiriwang.

Salamat, Panginoon, sa mga santo na ibinigay Niyo para maging aming modelo.

Katulad Ni Moises

Kapag kausap ako ng lola ko tungkol sa nanay ko, madalas niyang sabihin, "Naku, 'yang nanay mo..." Sasabat naman ako, "Ibig niyo bang sabihin ang anak n'yo?" Tumatawa na lang siya.

Kung ang nanay ko naman ay may sinasabi tungkol kay Tatay, sinasabi niya, "Hay! 'Yang tatay mo..." at hirit ko naman, "Ah yung bang pinakamamahal n'yong asawa?"

Gusto ko lang sanang makita nila na ang ating paraan ng salita ay nahubog na magpasa ng sisi sa ibang tao. Para bang gusto natin parating sabihin, "Kasalanan mo kung may gawin siyang masama. Wala akong responsibilidad sa taong iyan."

Mas mainam kung aaminin natin na tayo ay may pananagutan din, sa masama man o magandang inaasal ng taong ito. Katulad ni Moises. Inako niya ang responsibilidad niya sa mga Israelita. Alam niyang nararapat silang parusahan kaya't hindi na niya hinintay na lipulin sila ng Diyos. Bilang pinuno, inako niya ang tungkuling magparusa sa kanila, at dahil dito, maging siya ay nagdusa.

Kaya ba nating maging katulad ni Moises? Jomar H.

Pagninilay: Katulad ka ba ni Moises?

Turuan Niyo akong gayahin si Moises sa pamumuno niya na galing sa kapangyarihan mo at sa pagmamahal.

Huwag Kalimutan

Sa dami ng inaasikaso ng isang ina, malamang meron siyang malilimutan. Oo, kahit sarili niyang anak. Nakarinig na ako ng mga kwento ng mga ina na nakalimot sunduin ang anak sa eskwela, naiwan nila sa tindahan ang anak nila. May isa, nalimutang pumunta sa graduation ng anak niya at wala siya upang ikabit ang medalya sa anak niya. O kaya nakalimot paghandaan ng pagkain ang pamilya.

Naranasan ko rin yan sa sarili kong ina. Hindi ko naisip na aabot sa panahon na malilimutan niya kung sino ako. May Alzheimer's disease kasi ang nanay ko. Una, nalilimutan lang niya ang mga sinabi ko. Kalaunan, pati na kung saan ako nakatira. Nung grumabe na, nalimutan na niya ako kung sino ako.

"Ano? Anak kita?" tanong niya sa akin na tila hindi ako naniniwala. Nang umoo ako, ang sagot niya, "Oww?"

Mahirap isipin na malilimutan ng isang ina ang kanyang anak. Pero nangyari sa akin. Ngayon, isipin mo kung anong ibig sabihin ng Diyos nung sinabi Niya na hindi Niya tayo malilimutan.

Naalala Niya ang lahat ng pangako Niya.

Naalala Niyang basbasan tayo. Naalala Niyang protektahan tayo. Naalala Niyang bigyan tayo. Hindi Siya nakakalimot. Rissa S.

Pagninilay: Naniniwala ka ba na kayang tupdin ng Diyos ang lahat ng sinabi Niya?

Banal na Espiritu, ipaalala mo sa akin ang lahat ng pangako ng Diyos.

Diyetang Pangkaluluwa

"Sinunod mo ba ang diyeta na binigay ko sa iyo?" tanong ng doktor.

"Opo, dok." sagot ng pasyente.

"Eh bakit iba ang sinasabi ng mga test results mo?"

"Eh dok, di naman masama kung patikim-tikim lang, di ba?"

May mga bagay sa mundo na ang hirap tiisin kahit alam nating makakasama sa atin. Kinukumbinsi natin ang ating mga sarili na kaya nating pigilan ang ating mga hilig ngunit madalas ay di ito nangyayari.

Maraming ibinubunga ang kasalanan. At kung di tayo mag-iingat, baka masilo tayo sa bitag ng demonyo. Kailangan nating manindigan na umiwas sa kasalanan. Hindi sapat ang subok lang; dapat buong tapang at lakas natin itong iwaksi kung gusto nating makalaya.

Ang isang matalinong tao ay marunong lumayo sa ano mang bagay o sitwasyong magpapahamak sa kanya. Ang taong may pagmamahal sa Panginoon ay sisikaping hindi mabahiran ng dungis ni Satanas. Jane G.

Pagninilay: Ilang beses mo na bang ikinumpisal ang kasalanang iyon at iyon din ang ikinukumpisal mo?

Panginoon, hawakan Ninyo ako sa harap ng tukso, at bigyan ako ng lakas para labanan ito.

Radikal Na Pagsunod

Sa Sam (di n'ya tunay na pangalan) ay nag-volunteer sa isang ministry para sa mga bayarang babae. Nakilala niya ang isa sa mga babae doon, at kahit ganoon ang kanyang propesyon, umibig si Sam sa kanya dahil nakita nya ang kagandahan ng kanyang puso.

Ikinasal sila at nagkaroon ng mga anak. Ngayon, dalawa na sila na naglalakbay sa buong mundo para magbigay payo sa mga babaeng nabubulid sa prostitusyon.

Totoong kwento ito at hindi kathang-isip lang.

Si Jose rin ay hindi nag-atubiling sundin ang utos ng Panginoon. Nagpakasal siya kay Maria kahit na ito ay nagdadalang-tao. Si Sam at si Jose ay parehong hindi nakinig sa mga sinasabi ng mga tao sa paligid nila.

Tinatawag tayo ng Panginoon na maging katulad nila. May ipinapadala rin Siyang mga anghel na kailangan nating pakinggan para masunod ang kalooban Niya. Cristy G.

Pagninilay: Kaya mo bang makinig at sumunod sa Diyos ng walang pasubali?

Kayo, Panginoon, ay maaring maghusga. Pero paaalahanin Ninyo ako parati na wala akong karapatang humusga sa iba.

Bagong Likha

Si Francis ay isang makamundong tao. Wala siyang pananagutan maliban sa kanyang sarili. Nagtatrabaho siya sa umaga at nagwawala sa gabi. Alak at babae ang inaatupag pagkatapos na trabaho. Mahilig rin siyang kumanta, lalo na kung lasing na.

Tulad ng ina ni San Agustin, ang nanay ni Francis ay naglalakad ng paluhod para sa pagbabago ng kanyang anak. Bawa't gabi ay hinihintay niya itong umuwi at minsan ay sinusundo sa mga bar kapag di na makalugapay sa kalasingan.

At kung paano pinakinggan ng Diyos ang dasal ni Sta. Monica makalipas ang maraming taon, tinugon din ng Diyos ang mga panalangin ng ina ni Francis. Ngayon ay mahilig pa rin siyang kumanta at sumayaw. Ngunit ito'y mga awit at sayaw ng papuri sa Diyos, kasama ang kanyang mga bagong mga kaibigan na nakikibahagi rin sa kanilang bagong buhay.

Si Francis ay naligaw, ngunit muling nasumpungan. Chelle C.

Pagninilay: Kailan ka iniligtas ng Panginoon sa kadiliman?

Sa pinakamababang lugar na aking kinaroroonan, itinasa Niyo ako. Salamat, Panginoon

Ang Tagapagbalita

"Ang tapang niya," sabi ng asawa ko habang nanonood kami ng balita. Ang tinatawag niyang matapang ay ang tagapagbalita na sumulat ng ulat tungkol sa mga makapangyarihang pulitiko.

Kilala ko ang correspondent na iyon. Mahal niya ang kanyang trabaho, at hangarin niya talaga ang ihayag ang katotohanan, kahit ano pa ang mangyari. "Kaya siya ganoon dahil hindi siya takot mamatay," sabi ko sa asawa ko.

Bigla akong natahimik. Tinanong ko ang sarili ko king ganoon ko ba kamahal ang trabaho ko na kaya kong gawin ang ginagawa ng tagapagbalitang ito. Naisip ko rin kung sapat ba ang pagmamahal ko sa Panginoon na handa akong mamatay para sa aking pananampalataya. Dahil sa ngayon, ang hinihingi sa akin ng Diyos ay mamatay ng konti lang - gaya ng huwag maging mainggitin, huwag maging mainitin ang ulo o huwag maging banidosa.

Oo, gusto ng Diyos na mahalin ko Siya nang lubos at buong tapang na baguhin ang aking ugali. Wala Siyang ibang hinihingi. Cynthia S.

Pagninilay: Gaano ka katapang?

Palakasin Niyo ako, Panginoon. Gawin Niyo akong matapang sa pagtalikod sa aking masasamang ugali.

Langit Sa Lupa

Isa sa pinakamatalik kong kaibigan na si Jed ay namatay ng napakabata dahil sa isang malubhang sakit. Gusto kong ibahagi ang sulat na ibinigay ko sa kanya bago siya lumisan:

Isa sa mga paniwala ko bilang Kristiyano ay ang lahat ng bagay na nagaganap sa ating buhay ay bahagi ng plano ng Diyos. Alam mo ba ang kinahihinatnan ng planong ito? Gusto Niya na makabuo tayo ng isang komunidad ng pagmamahal para sa Kanya at isa't-isa. Gaya ng sakit mo. Mahirap siyang dalhin, pero hindi ba dahil dito ang dami mo ring natanggap na biyaya? Lahat ng mahal mo sa buhay ay nandiyan para sa iyo. Naramdaman mo na kung ano ang ibig sabihin ng langit sa lupa. Bagama't wala tayo sa ganap na kundisyon tulad ng sa langit, mayroon naman tayong dalisay na pagmamahal na babago sa atin. Nasa iyo ang kakayahang gawin ito.

Oo, sa kabila ng ating mga kahinaan, alitan, paghihirap at lungkot, maaari pa rin nating ipagsabi na nakatira tayo sa Kaharian ng Diyos. Kailangan lang na mahalin natin ang Diyos at ang isa't-isa. Ganyan lang ka-simple. Cotics C.

Pagninilay: Makapasok lang tayo sa kaharian ng langit kapag tayo ay namatay na. Pero ang kaharian ng Diyos ay nagsisimula na sa atin.

Mahal Kita, Panginoon. Ipakita Mo sa akin kung papano ko maipapadama sa iba na mahal ko rin sila.

Nanigas Na Kaluluwa

Tuwang-tuwa ako dahil ngayon lang ako makakabisita ng Amerika nang taglagas. Lagi kasing tag-init kung pumunta kami roon.

Lahat na yata ng mga kamag-anak ko't kaibigan ay nagtext sa akin na magdala ng makakapal na damit. Nakulili ang tenga ko sa mga paalala nila na kailangan patung-patong ang mga damit ko dahil ito na raw ang pinakamatinding lamig na mararanasan ko sa tanang buhay ko.

Pinakinggan kong lahat ng payo nila. At hindi ako namatay sa lamig. Nakinig ako at nabuhay. Bagama't gininaw pa rin ako, dahil sa payo nila, buhay pa rin ako.

Madalas, bibigyan din ako ng Panginoon ng mga paalala kapag may suliranin ako. Kaya lang, dahil hindi naman ako maninigas sa lamig kapag hindi ko Siya pinakinggan, mas madali ko Siyang balewalain.

Pero hindi ba't ang hindi pagsunod sa Diyos ay parang desisyon na rin na magpakamatay? Bakit hihintayin ko pang mapunta ako sa pinakamadilim at pinakamalamig na hukay bago ako makinig? Anna G.

Pagninilay: Binabalewala mo ba ang mga utos ng Panginoon?

Turuan Niyo akong makinig at sumunod sa Inyo.

Ipasa Mo

Noong nasa Florence, Italy ako nung isang taon, naligaw ako at nakasakay ako sa isang bus na konti ang pasahero. May mag-asawang Pilipino na sumakay din sa bus at kasama nila ang kanilang anak na tatlo o apat na taong gulang. Nagulat ako na Tagalog ang salita nila sa bata. At tinuturuan pa nila na huwag kalimutan na magmano kay Lola pagdating nila sa bahay. Di lang iyon. Itinuro pa nila ang isang binatilyo na may hawak na bote ng beer sa loob na bus. Tinanong nila ang bata kung gagawin ba niya yun paglaki niya. Sumagot naman ang bata na hinding-hindi siya iinom ng alak kahit na malaki na siya.

Do ko alam kung matutupad ng bata ang pangako niya. Pero humanga ako sa mga magulang niya na patuloy na itinuturo sa kanilang anak ang mga mahahalagang bagay na natutunan nila sa Pilipinas kahit nasa ibang bansa na sila. Siguro natutunan din nila ito sa kanilang mga magulang.

Paano nga ba tayo makatitiyak na ang mga pinahahalagahan natin ay mananatili kahit wala na tayo? Ipasa natin ito sa mga bata. Victoria L.

Pagninilay: Naniniguro ba tayo na kung ano man ang mahalaga sa atin ay naipapasa natin sa mga sumusunod na henerasyon?

Sana nawa'y ang mga biyaya ng ibinigay Niyo sa akin ay maipasa ko sa iba.

Pagpapatawad

Disyembre 2005. Isa ito marahil sa pinakamasakit na panahaon para sa aming mag-asawa. Nagkaroon kami ng problema sa aming mga kamag-anak at isang araw matapos ang Pasko, nagkaroon ng alitan. Pinag-uusapan kasi kami ng iilan sa kanila at ang iba naman ay hindi kami kinakausap.

Bagama't humingi ako ng paumanhin, kailangan pa ring gumawa kami ng aksyon para maayos ang gusot. Para magawa namin ito, kailangan muna naming lumayo sa gulo at planuhin kung ano ang layunin namin sa darating na taon.

Matapos magsimba ay napadpad kami sa isang kainan. Doon nagdasal kami nang taimtim para sa mga nakasakit sa amin. Dahil dito, naging payapa kami at marami kaming napag-usapan. Nakapagpasya kami na magpatawad at hindi ito naging gaanong kahirap.

Isa sa aming mga leader, si Nancy Dornan, ang nagsabi: "Ang di pagpapatawad ay gaya ng pag-inom ng lason at pagdarasal na yung isang tao ang mamatay."

Aray! Ariel D.

Pagninilay: Ang di pagpapatawad ay gaya ng pag-inom ng lason at pagdarasal na yung isang tao ang mamatay.

Magdedesisyon ako ngayon, Panginoon, na magpatawad sa lahat ng nakasakit sa akin at ipagdarasal ko na biyayaan Mo sila.

Sa Amin O Sa Inyo?

Naalala ko si Rod nung mabasa ko ang talatang ito. Isa siyang doktor na dalawang taon ang tanda sa akin. Nang makatapos siya ay agad siyang nagsanay bilang resident doktor. Matapos ito ay umuwi siya kaagad sa Ozamis para magsilbi doon.

Masigla siyang nagtayo ng sarili niyang klinika. Subalit ang nakakalungkot, hindi siya tinangkilik ng mga taong nakakakilala sa kanya. Binigyan niya ang sarili ng dalawang taon at baka sakaling magtagumpay.

Sa loob ng dalawang taon na iyon, nakilala niya si Ellen na taga Tacloban. Sa amin, o sa inyo? Yun ang naging tanong. Pagkatapos ng kasal, lumipat si Rod sa Tacloban at nagtayo ng klinika. Tatlumpu't limang taon na sila roon, at doon siya nagtagumpay.

Ganoon din ang nangyari kay Hesus. Dahil kilala Siya ng kanyang mga kababayan, hindi sila maniwala na Siya ang Mesiyas. Bakit nga ba? Hindi ba ordinaryong tao lang Siya mula sa isang ordinaryong pamilya? Ang pagkakilala nila sa Kanya ay naging hadlang upang malaman nila ang tunay Niyang katauhan. Henry Y.

Pagninilay: Hindi man ako tanggap sa sarili kong bayan. ang Panginoon ay hindi ako itatakwil kahit kailan o saan pa man.

Paalalahanan Niyo ako, Panginoon, na sa kabila ng lahat, ako ay Iyong anak at Ikaw ang aking Ama.

Trahedya

Noong pumutok ang Pinatubo, maraming Kristiyano ang nagsabi na nangyari ito dahil kailangang "linisin" ang Olongapo.

Nang maganap ang tsunami at maraming resort sa Thailand at ibang bansa ang nasalanta, anila'y parusa raw ito sa kanila dahil sa kasalanan ng prostitusyon.

Sa ating mga karanasan, kapag pumalpak ang isang proyekto natin, o mayroon tayong nabalitaang may malubhang sakit at di siya gumagaling kahit maraming nagdadasal, di ba hinihinala natin na dahil ito sa mayroong mabigat na kasalanan?

Ang mga pagbasa ngayon - pati na ang 1 Corinto 10:13 - ay nagsasabi na walang isa man sa atin ang may karapatang magsabi na mas malinis tayo kaysa sa iba. Lahat tayo ay nagkasala. At lahat tayo ay maaring masangkot sa trahedya gaya ng Pinatubo, magkasakit nang malubha at hindi gumagaling, o kaya ay pumalpak sa isang proyekto.

Ito ang dahilan kung bakit kailangan nating magpakumbaba at aminin ang ating mga kahinaan. Sa ganitong paraan, anumang oras na dumating muli si Hesus, may mga bunga Siyang madadatnan sa atin. Victoria L.

Pagninilay: Ako ba ay nagmamalinis at nag-iisip na mas makasalanan ang ibang tao kaysa sa akin?

Turuan Niyo po ako na tumingin lamang sa kahinaan ko at hindi sa iba.

Awang Di-matarok

Maraming beses na nating narinig ang kwentong ito. Lumayas ang anak, winaldas ang pera, naghirap at nagutom, umuwi na puno ng pagsisisi at handang magsilbi bilang alila. Ngunit naghihintay pala ang kanyang ama, at kaagad siyang niyakap. Pambihira! Sinong magsasawa sa kwentong ito? Ito ang kwento nating lahat.

Alam naman nating patatawarin tayo ng Diyos, pero bakit ayaw pa rin nating magbalik loob sa kanya?

Isang dahilan na madalas kong marinig: Masyado nang marami at malalim ang mga kasalanan ko. Di ako karapat-dapat na patawarin.

Matagal na akong deboto ng Banal na Awa dahil ako ay naniniwalang maaabot ko ang Langit hindi dahil sa ako'y karapat-dapat kundi dahil lamang sa Kanyang di-matarok na banal na awa! Ito ang handog Niya sa atin dahil Siya ang ating Ama. Alvin B.

Pagninilay: "Kung ang ating kaluluwa ay tulad sa katawang nabubulok, na sa tingin natin ay di na muling mapanumbalik, hindi ganoon ang tingin ng Panginoon. Ang himala ng banal na awa ni Hesus ang mapapanumbalik sa atin ng lubusan." - St. Faustina

Maawa Ka sa amin at sa buong mundo...Hesus, Hari ng Awa, nagtitiwala ako sa Iyo.

Ang Aking Mangangaral

Ang asawa kong si Jon ay isang mangangaral. Binatilyo pa lang siya noong nakilala niya si Hesus. Alam kong labis niyang mahal ang Diyos, dahil maging ako ay inilapit niya sa Kanya. Noong dati kaming magkaopisina, ikinuwento niya sa akin ang kanyang buhay-Kristiyano. Nakumbinsi niya akong sumali rin. Alam niyo na ang sumunod.

Ngayon, siya ang National Mission Director ng grupong Familia. Mga single professionals sa buong Pilipinas ang hawak niya. Gustong-gusto niya ang tungkulin niyang ito, dahil alam niyang dito siya tinatawag ng Panginoon. Tinuturuan niyang maging mga susunod na pinuno ng komunidad ang kanyang mga miyembro, at alam niya kung kailan sila handa para ipadala sa iba't-ibang probinsiya upang magpahayag ng salita ng Diyos.

Dahil tinawag siya ng Diyos at agad siyang sumunod. Mapalad ako at si Jon ang napangasawa ko. Wala na akong hihilingin pa. Marissa E.

Pagninilay: Tinatawag ka ba ng Panginoon para gampanan ang isang misyon? Huwag mag-alinlangan. Tumalima kaagad!

Pagpalain po Ninyo ako! Palawakin Ninyo ang aking lupain. Ilayo Ninyo ako sa kapahamakan para hindi ako mahirapan.

Gusto Mo Maging Boss?

Nakakatamad ang Monopoly. Masyadong matagal laruin. At ano nga bang nakukuha mo? Mga karton na "pag-aari" daw at "gusaling" ni daliri mo ay di magkasya, at maraming perang papel na di naman makabili ng kendi sa kanto.

Sa ebanghelyo natin ngayon, ang mayamang mama ay nasa impiyerno hindi dahil sa kayamanan niya, o dahil may ginawa siyang masama kay Lazarus. Naroon siya dahil wala siyang ginawa. Hindi siya nagmahal. Marami nga siyang pag-aari, gusali at pera, pero ang lahat ng ito'y nawalan ng saysay at nagmistulang siga sa apoy ng impiyernong kanyang kinasadlakan.

Si Lazarus naman ay kapiling na ng Panginoon at naglilingkod sa tunay na "Boss." Ang kanyang kwalipikasyon: Tinanggap niya ang pag-ibig ng Diyos at ibinahagi ito.

Akala ng mayaman na kaya pa niyang utus-utusan si Lazarus na nasa langit kahit siya naman ay nasa impiyerno. Ngunit ang pagiging "bosing" sa lupa ay walang kahulugan sa mata ng langit. Dahil doon, si Hesus lamang ang tunay na Amo ng lahat. Jon E.

Pagninilay: Gusto mo maging tunay na Boss? May "K" ka ba?

Tulungan N'yo akong mahalin ang mga taong nakakasama ko. Ang aking mga katrabaho, mga pulis trapiko, ang aming kasambahay, ang aking pamilya...

Masayang Naglilingkod

Medyo magulo ang naging takbo ng aking karera. Tapos ako ng kursong Nursing pero naging telemarketer, sales coordinator, marketing assistant at marketing manager, bago ako nawalan ng trabaho. Pagkatapos, naging nurse volunteer, nurse sa pamahalaang ospital, at ngayon ay isang nurse-teacher o clinical instructor.

Tinatanong ko nga ang Diyos kung ano ba talaga ang gusto Niya para sa akin. At natuklasan kong sa lahat ng naging trabaho ko, isa lang ang mensahe Niya: Magsilbi at magbigay buhay sa marami.

Nag-marketing ako para makatulong magpaaral ng mga kapatid ko. At nang makatapos na sila, sinunod ko ang puso ko at bumalik sa nursing. Masaya akong nagsisilbi sa mga maysakit at mahihirap hindi lang "kahit na" kundi "dahil sa" hindi ako nababayaran. Pinili kong pumasok sa pamahalaang ospital upang lalong makapaglingkod, magtiis at magtrabaho. Ang nagbibigay sa akin ng lakas ay ang di maipaliwanag na ligaya na maglingkod kay Hesus sa mga dukha.

Totoo ngang ang sekreto ng J-O-Y ay: J=Jesus, O=Others, Y=You. Ang lakas ko ay galing kay Hesus, sa paglilingkod sa iba, at sa kagalakang nararamdaman ko sa loob. Joie C.

Pagninilay: Gusto mo bang lumigaya? Maglingkod at magmahal gaya ni Hesus?

Turuan Niyo akong maging mapagbigay...na 'di tinutuos ang halaga.

Ang Lihim Na Kalaban

Katatapos ko lang mamuno sa "baptism" sa isang Life in the Spirit Seminar at sobra ang gutom at pagod ko. Pumasok ako sa unang kainan na nakita ko at kumain na parang walang bukas.

Habang humihigop ako ng sabaw at nagbabasa ng aklat, nakita kong tinititigan ako ng isang malaking mama na nakakunot ang noo. Gustong kumawala ng aking pagkabarumbado, ugaling akala ko'y naalis ko na. Tinitigan ko rin siya, hindi talaga tumitigil si King Kong. Muntik ko na sana siyang hamunin, "Anong problema mo, pare?"

Biglang nagsalita ang mama, "Ikaw ba 'yung nagsalita sa LSS namin kanina? Sorry nakatitig ako ha? Hindi kasi kita makilala dahil di ko suot ang aking salamin."

Para akong binuhusan ng malamig na tubig. Napalitan ng matinding hiya ang galit ko, at niyakap ko na lang siya.

Humingi ako ng tawad sa Panginoon. Napagmuni-muni ko na habang nabubuhay tayo, hindi natin lubos maiwasang gumawa ng masama. Kaya't lagi nating kailangan ang awa at patnubay ng Diyos. Dahil sarili natin ang pinakamatindi nating kaaway. "Kinakailangang Siya'y maging dakila, at ako naman mababa." (Juan 3:30) Obet C.

Pagninilay: Kapag tiningnan tayo ng mga tao, maaalala ba nila ang Diyos?

Baguhin Niyo ang aking puso. Nawa'y maging tulad sa Inyo.

Simple Lang Yan

Isang tingin lang sa tao at may opinyon ka na sa pagkatao niya.

Malinis ang mga kuko nya: Malinis siyang tao.
Payak manamit: Simpleng tao 'yan.
May bagong kotse: 'May kaya!"
Diretso ang buhok niya: "Baka nakapag-asawa ng mayaman." (Sabi sa patalastas!)

Pero pwede itong maging komplikado...

Maingay at (KSP) kulang sa pansin: Siguro miserable siya nung bata; mahirap siyang maging kaibigan.
Mahiyain: Baka inabuso siya nung maliit sya, di ko na lalapitan.

"Yang mag-asawang yan? Di sila malambing sa isa't-isa. Siguro di sila minahal nung bata. Kawawa naman ang mga anak nila, magiging konsumisyon din."

Ganito ang mga iniisip ko. Nakakahiya. Maaaring mali lahat ng mga ito dahil hindi ko naman kayang unawain ng lubos ang sinuman. Ano ang dapat kong gawin? Maging mahabagin at maunawain. Tumanggap. Magpatawad. Magmahal.

'Yun lang! Lallaine G.

Pagninilay: Madalas ba akong maghusga?

Linisin Ninyo ang aking pag-iisip, at turuan akong tingnan ang aking mga kapatid gaya ng pagtingin N'yo sa kanila.

Huwag Kang Matulog

Mayroon akong pinapagawa sa mga estudyante ko na nakakaaliw. Kailangan nilang isulat ang kasagutan sa tanong na ito: "Kung ikaw ay binigyan ng pagkakataong maging Diyos sa loob ng isang araw, ano ang mga gagawin mo?"

Sagot ng iba, pakakainin nila lahat ng nagugutom sa mundo. May nagsasabing gagawin nilang mayaman ang mga mahihirap at ang mayayaman ay gagawing mahirap, kashit isang araw lang. May mga iilan na lilikha ng bago at mas magandang mundo. Minsan ay may nakita akong estudyante na natutulog. Nilapitan ko siya para gisingin at tapusin ang kanyang seatwork. Laking gulat ko nang mabasa ko ang sinulat niya. Isa lang ang sagot niya: "Kung ako ang Diyos sa loob ng isang araw, ako ay matutulog."

Marami tayong bagay at oportunidad na di-makakamit kung tulog tayo nang tulog. Maging ang presensya ng Panginoon ay di natin mapapansin. Baka nga tulog ka ngayon pero di mo lang alam. Tanungin mo ang iyong sarili: "Anong bahagi ng buhay ko ang tulog at marami na pala akong di nakikita?"

Kaibigan, gumising ka at damhin ang Kadakilaan ng Panginoon sa buhay mo. Arun G.

Pagninilay: Ang taong ganap na buhay ay Luwalhati ng Diyos.

Gisingin Mo ako, Hesus. Gusto kong makita ang Iyong kaluwalhatian.

Ipagdasal Ang Mga Umaapi

Parang ang daling sundin, ano? Ipagdarasal mo lang naman ang mga umaapi sa iyo. Subalit ano ba talaga ang hinihingi ni Lord sa atin? Sabi sa Amplified Bible version: "Pagpalain niyo ang mga sumusumpa sa inyo, idalangin ninyo ang kabutihan ng mga umaapi sa inyo
(Lucas 6:28).

Teka, iba na ito a! Hindi ko na yata kayang gawin ito!

Naalala ko nung unang beses na sinubukan ko itong gawin, halos dumugo ang ilong ko bago ko sinabi, "Panginoon, basbasan mo po ang aking kaaway, at ipagkaloob sa kanya ang lahat ng mga biyayang nais mong ipagkaloob sa akin."

Mahirap talagang himingi ng biyaya para sa mga kaaway natin ng higit pa sa hinihiling natin para sa ating sarili. Subalit kapag nagawa natin ito, ipinapakita natin ang ating pagtitiwala na marunong ang Diyos at alam Niya kung ano ang pinakamabuti sa atin. At dahil tayo ay sumusunod sa utos Niya, lalo Niya tayong bibiyayaan. Rissa S.

Pagninilay: "Kung tayo ay iniinsulto, hindi sapat ang hindi natin pagdamdam nito; kailangan gawin pa natin itong pagkakataon na iwagayway ang Anak ng Diyos." (Oswald Chambers)

Panginoon, biyayaan N'yo ang lahat na umaabuso at nang-iinsulto sa akin. Bigyan Niyo sila ng kalusugan, ng magandang buhay at lahat ng ibig nila. Biyayaan Niyo ng tagumpay ang lahat ng paghihirap at pagtitiyaga nila.

Handang Makipag-ayos

Kung literal kong babasahin ang talatang ito, siguradong marami akong handog na iiwanan sa altar at di ko na mababalikan pa. Ngayon ay alam niyo na kung paano karami ang mga taong walang balak makipagkasundo sa akin.

Gayunpaman, naniniwala akong hindi ang lubos nating pakikipagsundo sa ating mga kaaway ang hinihiling ng Diyos sa atin. Gusto lang niya na tayo mismo ay handang makipag-ayos sa mga taong may galit sa atin. Ang ipakita natin at aminin na tayo rin ay nagkulang at naging sanhi ng sama ng loob ng iba, ay isang kababaang-loob. At kung tayo ay handang gumawa ng unang hakbang upang makipagkasundo, maaari na tayong bumalik sa altar at maghandog sa Panginoon.

Pagpapakumbaba at pagmamahal. Ang mga ito ang hinihinging alay ni Hesus sa atin...lalung-lalo na sa mga may galit sa atin.

Sa Kwaresmang ito, humingi tayo ng sapat na grasya para magawa ito.

Kailangan ko yatang magdasal ng tatlong beses bawat araw! Victoria L.

Pagninilay: Kung ayaw nating maghintay ng matagal sa altar, dapat matuto na tayong maging mapagkumbaba.

Iligtas N'yo ako sa aking pagmamalaki.

Huwag Matakot Humingi

"Gusto ninyo bang samahan ng french fries?" Simpleng tanong lang ito, pero dahil dyan, ang isang burger restaurant ay kumita ng dagdag na US$20 milyon sa isang taon. At kapag umorder ka pa ng softdrinks, tatanungin ka agad ng kahera, "Go large?" Milyong kita na naman yan!

Huwag kang matakot humingi. Kapag di ka natutong humingi, di ka magtatagumpay. Humingi ka ng payo. Hingi ka ng date. Hingi ka ng referral. Hingi ka ng benta. Alam ng mga nagbebenta na sa 100 katao na kanilang aalukin, 10 lang doon ang talagang bibili. Kaya maraming nanlulumo at agad sumusuko. Subalit yung mga mahuhusay ay maghahanap ng isang libong tao na pwedeng alukin, para makabenta ng 100.

Dahil ako ay pinuno ng mga organisasyon na hindi hangad ang kumita pero patuloy ang pagbigay ng milyones para tulungan ang mahihirap at para ikalat ang salita ng Diyos, natuto na rin aking humingi, Kaya ang Kerygma Family ay nakarating na sa buong mundo. (Kung di ka pa kasali, pumunta ka sa http://www.kerygmafamily.com. O di ba't humihingi na naman ako?)

Huwag kang matakot humingi. Bo S.

Pagninilay: Gumawa ka ng listahan ng mga gusto mo sa buhay. Simulan mo nang humiling.

Panginoon, salamat sa walang sawang paghiling na baguhin ko ang aking buhay.

Senyales Yan!

Isa sa mga paborito kong pelikula ay Got 2 Believe. Si Toni ang bida. Humingi ng senyales kung totoo ba niyang mahal si Lorenz. Nang mangyari ang hinihintay niya, ayaw niyang maniwala. Kailangan pang sabihan siya ni Lorenz sa bandang huli ng "I love you" para maniwala na siya talaga.

Dati ay mahilig din akong humingi ng mga senyales. Minsang hiningi ko ang isang partikular na plate number bilang senyales na itetext ko ang isang tao. O kung sa concert ng Freestyle ay tinugtog nila ang "Missing You," ibig sabihin huwag akong mawalan ng pag-asa sa crush ko.

Pero ngayong nag-mature na lang ako at nakita ko na di naman talaga ibig sabihin na kung dumating ang senyales na hinihingi mo ay mangyayari na talaga ang gusto mo. Mas mabuti pang huwag na lang pansinin ang mga senyales na dumarating dahil kadalasan hindi na nakikita ang tunay na biyaya ng Diyos!

Ngayon, hindi na ako humihingi ng senyales. Naniniwala at nananalig na lang ako sa pag-ibig ng Panginoon. Di niya ako papabayaan. Tina M.

Pagninilay: Ang iyong pananampalataya ba ay naka-depende sa mga senyales o sa pag-ibig ni Kristo?

Sana nawa'y sapat na ang Iyong pagkabuhay at pagkamatay bilang simbulo ng pag-ibig Mo.

Masakit Man Sundin

Sama-sama kami at nagyayakapan para di kami umiyak. Misa ng lamay ng aming ina. Magkahawak kami habang nagdasal kami ng Ama Namin. Di na namin kayang pigilin ang aming mga luha. Gusto ko man bigkasin ang mga salitang, "Sundin ang loob Mo," ay di ko magawa. Mahirap talagang sundin ang kalooban ng Diyos!

Nang dumating ang unang Pasko na di namin kasama si Mommy, muli kaming nagsama-samang magkakapatid at sinikap na naman naming huwag umiyak. Subali't di namin napigilan ang pagluha nang awitin namin ang Ama Namin. "Panginoon, masakit pa rin sundin ang loob Mo."

Apat na taon na ang nakararaan. Bumabalik-balik pa rin ang sakit at lungkot ng pagkawala ni Mommy. Pero may liwanag at kaligayahan na rin. Higit akong naging matatag na tanggapin ang paglisan niya. Naiintindihan ko na tinawag na siya ng Panginoon para mamahinga. At alam Niya na pag wala na si Mommy, magiging mas malakas ako at mas matatag.

Salamat, Panginoon, sa kalooban Mo. Tess VA.

Pagninilay: Kahit na masakit sundin ang kalooban ng Panginoon, gawin mo ito upang matuto kang maging lalong matatag.

Salamat, Panginoon, sa kalooban Mo.

Ginoong Mortis

Meron daw isang baguhang reporter na hirap na hirap pahabain ang sinulat niyang balita. Kaya't kinakailangan niyang mag-imbento ng mga detalye. Sabi niya: "Pagdating ng pulis sa pinangyarihan ng krimen para tingnan ang bangkay, nandoon na si Rigor Mortis. Nang inusisa nila si G. Mortis, sinabi nito na wala siyang kinalaman sa krimen." Nakakatawa di ba? Hindi ba niya alam na ang rigor mortis ay hindi pangalan ng tao kundi ang pagtigas ng bangkay makalipas ang ilang oras? Isang malaking kasinungalingan, ngunit sa maniwala kayo o hindi, nailathala ang balitang ito.

Ang pagiging makatotohanan ay mahalaga di lamang sa pamamahayag kundi sa lahat ng bahagi ng buhay. Utos ito ng Diyos sa unang pagbasa natin. Ang mga adik na nagsisikap na iwaksi ang kanilang bisyo ay kailangang maging "matigas" sa katotohanan ng kanilang pagkalulong. Ito ang susi sa muling pagsisimula at pagbabalik-loob sa kanila ng kanilang mga minamahal. Suriin nating mabuti kung may mga bahagi pa ng ating buhay na kailangan nating magmatigas sa pagpapakatotoo, bago pa dumating si G. Mortis. Roy M.

Pagninilay: Sana tingnan natin ngayon kung nagpapakatotoo ba talaga tayo. Huwag nating hintaying dumating si G. Mortis.

Ikaw ang Daan, ang Katotohanan at ang Buhay, O Hesus.